Министерот за надворешни работи на Албанија, Гент Цакај, вели дека Владата на Еди Рама не чувствува потреба да поднесе оставка поради недобивањето датум за почеток на преговорите со ЕУ. Коментирајќи го предлогот за предвремени избори во Северна Македонија, Цакај рече дека тоа го ветиле самите лидери.

„Во Северна Македонија имаше ветувања дека доколку не се случи ова поднесуваме оставка. Во Северна Македонија се дадени уверувања дека овој процес е неизбежен и дека ќе се случи. Јас не знам дали премиерот на Албанија, јас или некој друг владин претставник од јануари дал ветување дека преговори ќе има. Ние рековме дека сме посветени и ќе направиме напори за отворање на преговорите“-изјави Гент Цакај, министер за надворешни работи на Албанија.

Цакај рече дека одложувањето на одлуката за пролет не треба да се сфати како неповратен крај на европските аспирации ниту како конечен неуспех на политиките за проширување на ЕУ.

„Оваа одлука не е поради неуспехот на Албанија да биде на потребното рамниште на стандардите за отворање на преговорите за членство, туку тоа е директна последица на околностите во кои се наоѓа ЕУ, во процес на длабоко преиспитување на самата себе“-рече Гент Цакај, министер за надворешни работи на Албанија.

Претседателката на Социјалистичкиот сојуз за интеграција, Моника Криемади, рече дека додека Еди Рама е на чело на Владата, ЕУ е невозможна мисија за Албанија.

„Албанците сфатија дека Европа е со нив. Но, за жал, Албанците и нивната европска иднина денес се заложници на само еден човек, Еди Рама, и на кочењето на европскиот пат од негова страна. ЕУ кажа кои се конкретните пречки и кои се длабоките рани и критичните проблеми кои денес Еди Рама и ги нанесува на Албанија“-рече Моника Криемади, претседателка на ССИ.

Вчера премиерот Рама рече дека Албанија ќе продолжи со исполнување низа реформи зашто и се потребни на земјата, а не заради Брисел.

Вјолца Алити

Loading...

Shpërndaj me

Loading...