Вицепремиерот Кочо Анѓушев најверојатно ќе се повлече од функцијата на трети јануари 2020 година. Иако не сакаше да го каже датумот, дали ќе биде по изборите закажани за 12 април наредната година или пред, во изјавата за Алсат јасно навести кога ќе се врати на бизнисот.

„Значи јас имам потреба да седам во Влада сѐ додека Владата има мандат да одлучува. Влада која што нема мандат што нема мандат да одлучува е политичка Влада и во таа Влада јас немам потреба да бидам присутен“, вели Анѓушев.

Значи техничката Влада ќе биде без Кочо Анѓушев?

„Па еве тоа останува да го видиме“, одговара Анѓушев.

Инаку, се очекува техничката Влада да стартува со работа три дена после Нова Година. Премиерот Зоран Заев има разбирање за ставот на Анѓушев.

„Тој е сопственик на многу големи и сериозни фирми во државата кои што вработуваат повеќе од 1.000 наши граѓани и ќе имам целосно разбирање ако сака понатаму да се посвети на своите компании. Како што дружејќи со него видов дека добивката му е за 50 отсто падната, значи неопходноста од него неговите компаниите ја имаат, а неопходноста ја има и државата…“, рече Заев.

Сепак, денеска невладиното здружение Рефлектор излезе со податоци дека откако Анѓушев е на власт, добивката на неговите фирми се зголемила.

Анѓушев вели  дека наскоро ќе се  дознае вистината за учинокот на неговите фирми.

„Првата година работеа по инерција прилично добро, втората година веќе се осети значителен пад и на прометот и на профитот, на профитот некаде и до 50 проценти и тоа е нешто што јас не можам да го скријам тоа ќе го видите во Централен регистар во февруари 2020 година кога ќе ги предадеме завршните сметки“, додава Анѓушев.

Анѓушев во владата на Заев важи за алфа и омега кога се работи за носење на економските мерки, но беше познат и по тоа што на почетокот на неговиот мандат, поради сопствеништво во фирми и вршење на должноста вицепремиер, има во некои случаи конфликт на интереси.

Горан Теменугов

 

Loading...

Shpërndaj me

Loading...