Haliti – Ademi: Mbetemi në BDI /video/

Rafis Haliti dhe Xhevat Ademi do të vazhdojnë të veprojnë dhe kontribuojnë për realizimin e platformës programore të BDI-së. Nuk jemi pjesë e kryesisë qendrore me kërkesë tonën thonë edhe Aliti edhe Ademi, pikërisht ashtu siç informoi dje ALSAT. Rafis Aliti deri dje ishte nënkryetar i partisë, ndërsa Xhevat Ademi synonte postin e sekretarit të përgjithshëm të partisë, por Ahmeti vendosi që për sekretar të përgjithshëm të emërohet Abdylaqim Ademi.
“Nuk jam pjesë e kryesisë qendrore, pasi që ajo ishte kërkesë e imja që e bëra deri te kryetari Ahmeti dhe kryesia qendrore. Unë nuk jam shkarkuar, ishte kërkesë e imja që të mos jem pjesë e kryesisë qendrore. Gjithsesi se kontributin tim ashtu siç e kam dhënë në të kaluarën do ta jap edhe në të ardhmen. Gjithsesi se ngeli, BDI-ja është pjesë e imja dhe unë jam pjesë e BDI-së. Është obligim im që edhe më tutje të jap kontributin tim brenda BDI-së, pasi që mendoj se kjo forcë politike duhet ti çojë proceset para”, theksoi Rafiz Haliti, deputet i BDI-së.
“Në çdo projekt ka autorë dhe aktorë, unë jam njëri ndër autorët e projekteve të ndryshimit dhe reformave në BDI, dhe pa diskutim do të jem ndër personat e kyçur drejtpërdrejt në rrumbullakimin e kësaj nevoje dhe këtij projekti i cili edhe njëherë BDI-në do e dalloj nga subjektet tjera politike. Unë personalisht kam kërkuar nga kryetari i BDI-së, zoti Ali Ahmeti që të mos jem i kyçur në kryesinë qendrore të BDI-së, për faktin se kam dashur të përcjell mesazhin personal se ndryshimet nuk bëhen me emrat e njëjtë dhe me fytyrat e njëjta”, deklaroi Xhevat Ademi, deputet i BDI-së.
Rafis Haliti dhe Xhevat Ademi kanë kërkuar nga kryetari Ali Ahmeti të mos jenë pjesë e kryesisë qendrore, e përbërë prej 21 anëtarëve, vetëm pasi kanë parë se nuk janë propozuar për ndonjërin nga postet e nënkryetarëve dhe sekretarëve të partisë. Për të ulur tensionet dhe zbutur situatën hapat e tyre i ka ndjekur edhe Fazli Veliu, njeri i afërt i kryetarit Ahmeti, i cili gjithashtu ngeli jashtë kryesisë qendrore. Në vend se dy, BDI prej dje tani numëron katër nënkryetarë, edhe atë Gëzim Ostreni, Teuta Arifi, Nevzat Bejta dhe Izet Mexhiti, ndërsa Abdylaqim Ademi është sekretar i përgjithshëm dhe Hazbi Lika  sekretarë organizativ i partisë.

Bedri Rexhallari