Shqiptarët 19 vite jasht projekteve ekonomike

Cili është roli i shqiptarëve në ekonominë e Maqedonisë në 19 vitet e kaluara si shtet i pavarur? Sa për qind nga buxheti i takon shqiptarëve? Cilat projekte kapitale janë ndërtuar në vendbanimet me shumicë shqiptare dhe pse janë lënë jashtë procesit të privatizimit? Ish ministri i financave në vitet e 90-ta, Xhevdet Hajredini thotë se përkundër presioneve të vazhdueshme nuk është arritur që shqiptarët të marrin hisen që u takon apo të marrin pjesë në projktet ekonomike përfshirë edhe ato të privatizimit.
“Vetëm me presion më të madh ka pasur mundësi që pjesa adekuate e shqiptarëve në bruto produktin shoqëror të Maqedonisë t’u takojë edhe atyre afërisht. Kjo nuk është bërë as atëhere por as edhe sot ashtu si duhet, për shkak se si në aspektit të kërkesave politike por edhe ekonomike, hartuesi i politikës makroekonomike është partia më e madhe që e formon Qeverinë”, thotë Xhevdet Hajredini, Ish Ministri i financave nga radhët e PPD-së. 
Edhe pas 19 viteve si shtet i pavarur, ministri i Ekonomisë Fatmir Besimi thotë se ka hapësirë që një përqindje më e lartë e buxhetit t’i takojë shqiptarëve.
“Mendojmë se ka hapësirë për t’u avancuar struktura e tanishme e buxhetit, nëse marrim pasqyrën e buxhetit aktual“, thekson Fatmir Besimi, ministër i Ekonomisë.
Sipas Hajredinit në atë kohë prioritetet e shqiptarëve kanë qenë të ndryshme nga ato që janë sot.
“Dua ta theksoj faktin se tjera kanë qenë prioritetet atëhere, tjera janë sot. Sot janë pjekur kushtet meqë janë plotësuar disa nevoja elementare gjatë këtyre viteve për t’u aktualizuar çështja e ndarjes adekuate të buxhetit të Maqedonisë”, shton Xhevdet Hajredini.
Besimi, shprehet se BDI për 8 vite sa ka qenë në pushtet ka arritur të afrojë dhe zhvillojë ekonominë shqiptare, e cila ka qenë e lënë pas dore në krahasim me  pjesën maqedonase. Ai numëron ndërtimin e shkollave, rrugëve rajonale dhe lokale, zonën e lirë ekonomike në Tetovë dhe Marrëveshjet për tregti të lirë me Kosovën dhe Shqipërinë.
“Tani duhet të bëhet shumë që ajo të kompenzohet mirëpo thënë figurativishht nëse je në një garë dhe njëri nga garuesit ka ecur 80 për qind të rrugës ne duhet me një shpejtësi  fisht më të madhe të ecim që të arrijmë një nivel të barabartë”, vlerëson Fatmir Besimi.
Ndërkohë përpjekjet disa ditore të ALSAT-M për të marrë prononcimin e Partisë Demokratike Shqiptare, rreth kësaj teme ishin të pasuksesshme. Asnjë përfaqësues i kësaj partiu nuk iu përgjigjë thirrjeve për të komentuar zhvillimet ekonomike në Maqedoni që nga shpallja e pavarësisë. 
Nevzat Mamuti