Rritet numri i azilkërkuesve maqedon në Austri

Është rritur numri i azilkërkuesve nga Maqedonia në Austri. Rreth 120 qytetarë të Strumicës dhe Radovishit në dy muajt e fundit kanë udhëtuar për në Austri ku dhe kanë kërkuar të drejtën për azil. Nga Ambasada e Austrisë në Shkup njoftojnë se 40 qytetarë  nga Radovishi janë kthyer nga Austria. Përfaqësues të ambasadës austriake takuan sot ministren e punëve të brendshme Gordana Jankullovska për të njoftuar atë rreth dukurisë së rritjes së numrit të azilkërkuesve nga Maqedonia dhe mënyrën e parandalimit të saj. Sipas MPB-së dhe Ambasadës së Austrisë, azilkërkuesit kanë qenë të manipuluar nga disa agjenci turistike.
“Azilkërkuesit nga Maqedonia, në cilin do shtet të BE-së nuk do të fitojnë azil, duke pasur parasysh se Republika e Maqedonisë vlerësohet si shtet ku nuk ekzistojnë rreziqe për çka përcaktohet e drejta e azilit. Personat janë kthyer në mënyrë vullnetare, bëhet fjalë për 40 persona, pas kryerjes së bisedave nga përfaqësuesit e MPB-së Austriake, ata kanë pranuar vullnetarisht të kthehen dhe tashmë ndodhen në shtëpitë e tyre në Radovish.”, thotë Gordana Jankullovska, minsitre e Punëve të Brendshme.  
“Ambasada e Austrisë shpreh keqardhje se qytetarë të Maqedonisë janë bërë viktima të premtimeve të rrejshme të bëra nga agjencitë turistike joserioze lidhur me mundësinë e fitimit të mbështetjes financiare. Janë regjistruar raste ku janë paguar nga 500 euro për ndërmjetësim për dorëzimin e kërkesës për azil, bashkë me harxhimet e tjera nga 1 mijë euro e më shumë. Më 4 shtator ishin kthyer 40 personat e parë me autobus nga Austria deri në Strumicë, më shumë se 100 persona tjerë do të kthehen shumë shpejtë. U ishte premtuar mbështetje financiar mujore 400 euro në muaj nga ana e Austrisë', thotë Suzana Shmitc, zv.ambasadore e Austrisë. Alsat-M