Maqedonia kërkon ekstradimin e Lirim Jakupit

Ministria e Drejtësisë e Maqedonisë do të kërkojë ekstradimin e Lirim Jakupit-Nazistit, menjëherë pasi të marrë informatë zyrtare nga Interpoli për arrestimin e tij në Prishtinë. Pas kësaj, nga Ministria e Drejtësisë thanë për Alsat M, se do të fillojë procedura për kompletimin e dokumentacionit të duhur në të cilin përfshihen të gjitha veprat penale që Jakupi i ka kryer në Maqedoni. Nga ky dikaster thanë se edhe pse Shkupi e Prishtina nuk kanë firmosur marrëveshje bilaterale për ekstradim, duke u mbështetur në konventat ndërkombëtare mund të realizohet një gjë e tillë. Por nga institucionet e Kosovës thanë se nuk kanë marrë kërkesë zyrtare nga Republika e Maqedonisë për ekstradimin e të shumë kërkuarit, Lirim Jakupi-Nazisti, i cili është arrestuar dje nga pjesëtarët e njësisë speciale të Policisë së Kosovës. Lirim Jakupi 31 vjeçar ka shtetësi kosovare ndërsa është i lindur në Serbi. “Procesi i ekstradimit nuk është përgjegjësi e policisë së Kosovës është përgjegjësi e Ministrisë së Drejtësisë. Sido që të jetë personi ka qenë i kërkuar në Republikën e Kosovës për veprën penale arratisje nga burgu si dhe ka qenë në vuajtje të dënimit në Burgun e Dubravës për veprën penale të rrëmbimit...Akoma nuk kemi ndonjë kërkesë zyrtare nga ana e Maqedonisë” tha Arbër Beka, zëdhënës i Policisë së Kosovës. Zëdhënësi Beka tha se Jakupi do të dalë së shpejti para gjykatës, ku edhe pritet t’i konfirmohet akuza për arratisje, përderisa ai krahas kësaj akuze, duhet ta vuaj pjesën e mbetur të dënimit për rrëmbim. Shkëlzen Osmani