Kuvend:Zhbllokohet dialogu

Lidhja Social-Demokrate është rikthyer në mbledhjet koordinuese të Kryesisë së Kuvendit të Maqedonisë, duke zhbllokuar kështu dialogun në institucionin ligjvënës, që mbahej i bllokuar tashmë një kohë të gjatë. Opozita maqedonase, në emër të integrimit të vendit në institucionet euroatlantike, ka hequr dorë nga të gjitha kërkesat që kishin të bëjnë me rregulloren mbi punën e Kuvendit dhe caktimin e pikave të rendit të ditës në seancat plenare. VMRO-DPMNE ka mirëpritur zhbllokimin e punës së Kuvendit duke theksuar se rregullorja e re që pritet të miratohet nesër përfshinë të gjitha vërejtjet e paraqitura nga opozita. Ndërkohë kundër rregullores do të votoj Demokracia e Re e cila është e pakënaqur me statusin e përdorimit të gjuhës shqipe. DR-ja kërkon që gjuha shqipe përveç nga kryetarët e komisioneve, të përdoret edhe nga drejtuesit e seancave nëse janë shqiptar, pastaj komunikimi me shkrim të jetë në gjuhën shqipe, sikur edhe stenogramet, mbishkrimet dhe të gjitha paralajmërimet që jepen në tabelën e Kuvendit.