Ademi:Per dy vite e rrëzuam, dy vite bashkëpunuam

Nikolla Gruevski dhe Abdylaqim Ademi

Llogaridhënia e Gruevskit për katërvjeçarin e qeverisjes së tij, për partnerin e koalicionit qeveritar BDI-në, duhet ndarë në dy periudha. E para, e cila është e kontestuar dhe e papranuar nga partia e Ahmetit, është dyvjeçari i parë, kur pjesë e qeverisë ishte PDSH-ja edhe përkundër vullnetit të votuesve, kurse dyvjeçari i dytë është koha kur BDI-ja është pjesë e ekzekutivit. Zv/ kryeministri Abdylaqim Ademi, thotë se gjatë dyvjeçarit të parë të Qeverisë së Gruevskit, BDI-ja ka qenë e koncentruar në rrëzimin e saj dhe shkuarjen në zgjedhje të parakohshme. “Ne mandatin e tij katër vjeçar mund ta ndajmë në dy periudha, në pjesën kur ai ishte në koalicion me PDSH-në dhe në pjesën kur ai është në koalicion me BDI-në. Ashtu siç opinioni është i njoftuar, në pjesën e parë kur VMRO-DPMNE-ja kishte koalicione me PDSH-në, ne atë qeveri e quajtëm jo legjitime dhe pa mandat nga shqiptarët. Prandaj lirisht mund të themi se ajo pjesë  e qeverisjes për ne ka qenë e kontestuar, nuk e kemi pranuar dhe kemi luftuar me të gjitha mjetet që të ketë rënie të qeverisë dhe të ketë zgjedhje të parakohshme dhe ashtu ndodhi në vitin 2008” tha zv/kryeministri Abdylaqim Ademi. Ndërkohë në dyvjeçarin dytë të qeverisjes së Gruevskit, kur dhe BDI-ja është pjesë e Qeverisë, sipas Ademit janë realizuar një sërë projektesh të përbashkëta të cilat luajnë rol të rëndësishëm në ndërtimin e brendshëm të marrëdhënieve ndëretnike si dhe planin e jashtëm.“Në këtë pjesë dyvjeçare të mandatit tonë, ne kemi arritur të realizojmë disa projekte të rëndësishme të cilat kryekëput kanë të bëjnë me raportet e brendshme ndëretnike, duke filluar me implementimin e Marrëveshjes së Ohrit, por edhe disa projekte tjera të cilat kanë gjithashtu ndikim e dhe në marrëdhëniet e brendshme por edhe në marrëdhëniet rajonale dhe proceset integruese. Ashtu siç ishte shënimi i vijës kufitare me Kosovën, vendosja e marrëdhënieve diplomatike, njohja e pavarësisë së Kosovës, një realitet i ri në Ballkan. Projektet tjera dhe reformat të cilat realizohen edhe në administratë dhe në gjykata” shtoi Ademi. Ai tha se në këtë drejtim do të vazhdojë kjo bashkëqeverisje me VMRO-në edhe në dy vitet e ardhshme me qëllim të realizimit të premtimeve dhe obligimeve të marra në zgjedhjet e fundit të vitit 2008.  Bedri Rexhallari