Qeveri:Gruevski dha llogari

Më shumë se 75 minuta kryeministri Gruevski dha llogari para qytetarëve për katër vitet e qeverisjes por para opinionit doli i vetëm pa ministrat dhe pa partnerin e koalicionit BDI-në. Përmendi se nuk janë të pagabuar, por nuk kanë pasur asnjë gabim strategjik. Përmendi sukseset. “E di se një pjesë e madhe e popullatës, një numër i madh prej jush e ndjen kohën që po kalon pa vërejtur ndryshime ne vetveten. E di se shumicës prej jush po i humbë durimi. Njëzet vite ky vend po bën përpjekje të ngrihet nga goditja që e mori në tranzicion dhe kjo ndonjëherë di të zgjasë sa një e treta e jetës së njeriut. Asnjëherë nuk kam dhënë premtime të rrejshme dhe si çdoherë do të jem i sinqertë. Gjërat do të ndryshojnë, procesi i ndryshimeve tashmë ka filluar” tha kryeministri Nikolla Gruevski.
Gjatë qeverisjes së tij ka pasur dy probleme madhore, kontestin me emrin dhe krizën ekonomike. Për të parën nuk foli shumë, tha se nuk dihet kur do të ketë propozim të ri nga Metju Nimic dhe kur do të vijë ai do ta paraqes para partive dhe opinionit. Nuk vlerëson se vendi e ka humbur betejën në planin ndërkombëtar edhe pse thotë se kundërshtari është shumë më i fortë.“Secili kompromis i ofruar do të përfundoj para ju dhe vendimi do të jetë i juaji. Atë të drejtë nuk mund t’ua merr askush pavarësisht propagandës së fortë që udhëhiqet së paku derisa unë jam në krye të kësaj qeverie. Vendime të tilla miratohen bashkërisht, jo për shkak të mos guximit dhe vizionit që të marrim përgjegjësi për të cilën na akuzojnë por për shkak të postulateve themelore demokratike në të cilat ne si njerëz besojmë ajo është se vullneti i popullit është pamposhtur” u shpreh Gruevski. Edhe projekti Shkupi 2014 për kryeministrin ka pasur vlerë patriotike. Ka pasqyruar dashurinë e popullit ndaj të kaluarës.“Shkupi 2014 është mbyllja e një kaptine të Maqedonisë pa përmendore përkujtimore me histori pjesërisht të lejuar, tentim për rritje të analfabetizmit kombëtar dhe ulje të vetë respektit. Më tej, e gjithë kjo e ndjekur me mohime të vazhdueshme të kombit gjuhës, identitetit, historisë tonë nga të gjithë anët” tha Gruevski. Realizimin e Marrëveshjes së Ohrit Gruevski e drejtoi tek zëvendës kryeministri AbdulaqimAdemi por përmendi rritjen e numrit të punësimeve në administratë dhe ligjit për gjuhën. Iu shmang përgjigjeve direkte për rastet e Hagës me qëndrimin e njohur se për ato kompetent janë gjykata. Gruevski edhe sot tregoi se për 4 vite nuk ka ndryshuar shprehinë për vonesë. Llogaridhënia filloi me 20 minuta më vonesë. Frosina Cvetkovska