Vrasja në Shkup, dorëzohet vrasësi

Autori i vrasjes së trefishtë, që mbrëmë ndodhi në qendrën tregtare “Tri biserat” në lagjen aerodrom, në Shkup sot është dorëzuar në polici. Bëhet fjalë për 47 vjeçarin Toni Denkovskin nga Shkupi i cili para hetuesisë ka thënë  se 3 personat i ka vrarë për shkak të kërcënimeve të vazhdueshme që ka marrë nga 37 vjeçari Jordan Jordanovi për një borxh parash të pashlyera. Vrasësi veçmë është i evidentuar edhe për krime të mëparshme ndërsa njëri nga viktimat i cili edhe ka qenë në shënjestër të vrasjes Jordan Jordanov po ashtu është i evidentuar në polici kryesisht për tregti me drogë dhe tregti me armë, i cili ka qenë i dënuar edhe me burg. Gjithashtu këto dy persona dyshohen si pjesëtarë të ashtuquajturës “Mafia e Frankfurtit”. Viktima tjetër 36 vjeçari Vllado Milloshev ndërkaq është në lidhje familjare me shefin e sigurimit të kryeministrit Gruevski, Dejan Mitkovski Urko. Viktima e tretë është 26 vjeçari Vllatko Andreevski, nëpunës policie në seksionin për siguri, si punëtor kryesor operativ për sigurinë e delegacioneve të huaja. Nga MPB-ja nuk spjeguan arsyen e takimit të punonjësit të MPB-së me personat e dyshuar si pjesëtarë të mafies. Ministrja e Brendshme Gordana Jankullovska, përkundër vrasjeve që karakterizuan këtë periudhë tha se gjendja e sigurisë në vend nuk ka ndryshuar.
“Sektori për Punë të Brendshme në Shkup gjatë ndërmarrjes së masave taktike operative sot e zbardhi vrasjen e trefishtë që ndodhi në qendrën tregtare “13 nëntori” dhe sot në orët e hershme të mëngjesit është i siguruar personi që ka kryer veprën penale ku humbën jetën tre persona. Sipas deklaratës së tij të dhënë në polici motivi i vrasjes ka qenë një borxh i pa pastruar me njërin nga viktimat” tha ministrja e brendshme Gordana Jankullovksa. Vrasja ndodhi mbrëmë rreth orës 20  kur sulmuesi kishte hyrë në restorant dhe kishte shtënë me pushkë automatike dhe më pas me shpejtësi ishte larguar nga vendi i ngjarjes. Semra Jakupi