Ish funksionarë të lartë kthehen në PPD

Ish funksionarë të lartë të PPD-së kanë ngritur iniciativë për ringritjen e Partisë për Prosperitet Demokratik si forcë politike me qëllimin e vetëm që të ndikojnë në politikën e përgjithshme në Maqedoni. Iniciativa për ringritjen e PPD-së është marrë në një darkë të shtruar nga ish kryetari i PPD-së Abdfylhadi Vejseli në restorantin ATA në Tetovë. Në këtë takim joformal kanë marrë pjesë ish funksionarët të lartë të këtij subjekti politik Abdylmenaf Bexheti, Xheladin Murati, Ismet Ramadani, Mersel Bilalli, Zemri Elezi, Hasan Jashari, Abdylhadi Vejseli dhe Riza Shabani. Ish sekretari i PPD-së Zemri Elezi konfirmoi për ALSAT M takimin dhe tha se është formuar këshill që ka për obligim të njoftojë kryetarin aktual Sejfedin Harunin me të cilin do të merren vesh për riorganizimin.
“Ne nuk bëjmë parti të re politik, ne forcojmë PPD-në dhe ne nuk e forcojmë PPD-në që të futemi në Qeveri, që të marrim pjesë kolaçi, por ta forcojmë PPD-në që të jetë promotor inicues dhe themelues i trendeve politike aktuale në RM. Mendojmë se ka hapsirë, jo për të uzurpu elektoratin, jo për të kriju përçarje brenda subjekteve politike shqiptare, por ka hapsirë që PPD-ja nëpërmjet kuadrove të saj profesionale të skalitur me politikë të vjetër, të rrethojnë edhe rininë e partisë”, thotë Zemri Elezi, ish sekretar i PPD-së
Edhe pse si sekretar i partisë para dy vitesh Elezi dhe ish kreu i PPD-së Abdylhadi Vjeseli ishin bashkuar me PDSH-në e Thaçit, sot Elezi thotë se për gabimin e bërë në atë kohë, është shkarkuar nga kryesia e partisë, por se megjithatë mbetet anëtar i PPD-së.
“Nuk jam udhëheqës, më ka shkarkuar ky kuvend për arsye se ne atëherë e bëmë njëfar bashkimi, fazë e parë e bashkimit, për çështje më madhore jo të interesave partiake dhe personale por më madhore që të forcohet opozita shqiptare, një gjë e tillë nuk shkoi, dështoi, filluan dalngadalë të gjithë anëtarët e PPD-së të largohen, ne kemi ngel anëtarë të PPD-së, unë e kam librezën e PPD-së.”, shton Elezi.
Para dy viteve kryetari i PPD-së Abdylhadi Vjeseli kishte vendosur që ta shkrijë partinë  e tij në PDSH-në e Tha[it. Këtij vendimi i kishin paraprirë edhe takimet e komisioneve të dy këtyre partive. Edhe përkundër këtij vendimi të Vejselit dhe Elezit, kryesia aktuale e PPD-së në krye me Sejfedin Harunin, nëpërmjet gjyqit kishin kthyer mbrapa vulën dhe dokumentet e partisë.
Shkëlzen Aqifi