Demografët dhe opozita “pro” komisionit për regjistrimin e Popullsisë

Demografët arsyetojnë BDI-në që kërkon Komision të Posaçëm për regjistrimin e Popullsisë. Asllan Selmani, thotë se Enti i Statistikave e ka humbur besimin për të kryer këtë punë, dhe mbetet evident rreziku i manipulimin të rezultateve të regjistrimit.
“Nga argumentet që i boton vetë shteti se në Maqedoni ka nxënës të regjistruar 30 vite gati, pothuaj, 34-35 për qind, tani ajo moshë, ai kontingjent i rinisë shkollore është në kontingjentin e popullsisë së pjekur dhe se maqedonasit ende mendojnë se ka më pak se 20 për qind shqiptarë”, tha  Asllan Selmani, demograf.
Selmani arsyeton kërkesën e BDI-së që regjistrimi të mbikëqyret nga ndërkombëtarët.
“Mendoj se BDI-ja në këtë rast duhet të qëndroj deri në fund, tek e fundit edhe të mos i pranoj fare rezultatet”, u shpreh Selmani.
Edhe nga Demokracia e Re vlerësojnë se ideja e BDI-së për formimin e një komisioni vjen si rezultat i përfaqësimit të dobët dhe jo adekuat të shqiptarëve në Entin e Statistikave.
“Në hierarkinë më të lartë apo qoftë edhe në nivelet tjera udhëheqëse të entit statistikor nuk ka përfaqësim të bashkësive etike..... Sa i përket komisioneve të përbashkëta mendoj se nuk mundet të themi se jemi kundër një iniciative të këtillë pasi që këtu nuk bëhet fjalë për diçka partiake”, tha  Arijanit Hoxha, zëdhënës i DR-së.
Alsat u përpoq të kontaktonte edhe me zëdhënësit e PDSH-së për të pasur një qëndrim nga kjo parti, por nuk arriti të vendoste as kontakt telefonik.  Bedri Rexhallari