Bilalli: Bisedimet për emrin kanë përfunduar në qershor

Bisedimet mes Maqedonisë dhe Greqisë për çështjen e emrit kanë përfunduar në fund të muajit qershor, por kryeministri Nikolla Gruevski, i cili është i vetmi që e din zgjidhjen, taktizon për të kumtuar me qëllimin e vetëm që të mos humbë besueshmërinë tek popullata maqedonase. Kështu vlerëson analisti Mersel Bilalli, duke supozuar se zgjidhja do të mësohet vetëm pasi në formë të propozimit t’i jetë ofruar Athinës dhe Shkupit.
“Ekzistojnë indikacione serioze se në mënyrë të fshehtë bisedimet kanë përfunduar kah fundi i muajit të gjashtë dhe natyrisht presim vendimin politik, pra dritën jeshile të Nimicit i cili do të propozoje si propozim i tij dhe tërë kohën sikur taktizohet me shumë arsyetime se kjo nuk mund lehtë të tejkalohet në strukturat radikale, komitët, ata të cilët janë pjesë e strukturës së VMRO-së dhe nuk pajtohen që emri të ndryshohet”, theksoi Mersel Bilalli – analist politik.
Nga ana tjetër, Petar Arsovki, vlerëson se Qeveria një kohë të gjatë është duke aktruar bisedime. Ai thotë se pavarësisht pushimeve verore, Qeveria është dashur t’i qaset bisedimeve thelbësore për çështjen e emrit. Ngadalësimi i dinamikës së bisedimeve nuk është në favorin e Maqedonisë, vlerëson analist Petar Arsovski.
“Unë mendoj se një kohë të gjatë Qeveria nuk bën asgjë që në mënyrë thelbësore të ofrojë qëndrimet ose të tentojë të gjej zgjidhje për problemin që është i patjetërsueshëm. Ajo është një luks që ne nuk mund të lejojmë nga dy arsye , e para se neve na nevojitet NATO dhe BE, e jo ne atyre, e dyta nëse shohim historikisht mbrapa, sa më shumë presim në zgjidhjen e problemit me emrin, zgjidhja bëhet më e komplikuar, më shumë elemente bëhen pjesë e pakos së bisedimeve si gjuha, identiteti, tash edhe pronat e kështu me radhë”, theksoi analist.
Ndryshe kryeministri Nikolla Gruevski duke folur për çështjen e emrit, dje tha se Maqedonia mbetet e kyçur në  bisedime dhe në kontakt të vazhdueshëm me ndërmjetësin Nimic për të gjetur një zgjidhje të shpejtë të emrit.

Shkëlzen Aqifi