Nesër dhe pasnesër fillon regjistrimi për studentët e rinj

Nesër dhe pasnesër të gjitha universitetet shtetërore në Maqedoni do të jenë të hapura për të pranuar studentë të rinj, gjegjësisht të gjithë ata maturantë të cilët kanë kaluar maturën shtetërore. Siç bëri të ditur ministri i Arsimit Nikolla Todorov në universitetet shtetërore në vend gjithsej ka 27.046 vende të lira për vitin akademik 2010-2011. Në Universitetin “Shën Qirili dhe Metodi” në Shkup gjithsej ka 12.000 vende të lira, në Universitetin Shtetëror të Tetovës 4.500, në  “Shën  Klimenti i Ohrit” në Manastir rreth 4.300, në atë të Shtipit rreth 6.000 vende të lira ndërsa në atë të Shkencave të  teknologjisë dhe informatikës në Ohër ka 300 vende të lira për regjistrim. Ministri Todorov gjithashtu theksoi se këtë vit në mënyrë serioze janë rritur kuotat për studime, ndërkohë që janë ulur participimet, të cilat tani kushtojnë 200 dhe 400 euro.
“Në këtë mënyrë pres që rritja e numrit të studentëve të jetë rekord dhe një numër i madh i qytetarëve të vendosin që ta vazhdojnë shkollimin e tyre nëpër universitete. Këtu  nuk e kam fjalën vetëm për maturantët, ngase pres që edhe më shumë qytetarë të cilët para disa viteve e kanë mbaruar shkollimin e mesëm dhe nuk kanë vazhduar më tutje, ta shfrytëzojnë këtë vit dhe kushtet e volitshme për studime”, tha  Nikolla Todarov, ministër I arsimit.
Ndërkohë lidhur me përfundimin e punimeve ndërtimore në objektin e ri të Universitetit shtetëror të Tetovës, ministri Todorov tha se mjetet shtesë që janë paraparë me rebalancin e fundit të buxhetit do të ndihmojnë në përfundimin sa më të shpejtë të tij.
“Ato mjete do ti shfrytëzojmë për atë qëllim dhe shpresoj se në varësi të dinamikës së kompanisë ndërtimore, e cila po kryen këto punë, do të mundohemi që sa më shpejtë atë objekt ta lëshojmë në funksion. Pajtohem se ai objekt është i një rëndësie të veçantë për përmirësimin e infrastrukturës arsimore të Universitetit Shtetëror të Tetovës”, tha Todorov.
Afati i dytë i regjistrimit për maturantët është me 2 dhe 3 shtator, ndërkohë në universitetet ku do të mbeten vende të lira do të pasojë edhe afati i tretë i regjistrimit me 16 shtator.  Melihate Rustemi