Kufiri në Bellanoc pa doganë, reagojnë banorët

Banorët e komunës së Likovës mirëpresin paralajmërimet për hapjen vitin e ardhshëm të  pikës me Kosovën në Bellanoc, por kundërshtojnë deklaratat e autoriteteve se ai vendkalim kufitar do të jetë vetëm për qarkullimin e njerëzve, e jo edhe të mallrave. Banorët thonë se kjo zgjidhje është e pa pranueshme për ta, pasi kërkojnë që përveç udhëtarëve në atë pikë kufitare të mund të kalojnë lirshëm edhe prodhimet e tyre bujqësore në tregun kosovar.
“Edhe pleqtë tanë më parë kanë punuar me Gjilan, më shumë kanë punuar me Gjilan se sa me Shkup. Ai transporti i mallrave është më i rëndësishëm, edhe kjo është e mirë, lëvizja e lirë, por transporti i mallrave është më i rëndësishëm. Patjetër duhet transporti i mallrave, nëse nuk lëviz transporti i mallrave atëherë nuk ka kurrfarë rëndësie ky kufi”, deklaroi një banor i komunës së Likovës.
“Ma mirë do të jetë mu çel tregtia, ne kemi shkuar edhe për kafshë në këmbë në Gjilan, tregtinë e kemi bërë në këmbë, është rruga më e shkurtër këndej, është më mirë, çka është më mirë le të vazhdohet të punohet”, tha banor i komunës së Likovës.
Për çështjen e kufirit Bellanoc - Stançiç, DR-ja e Selmanit akuzoi sot, sekretarin shtetëror në MPJ, Abdulkadër Memeti se deklaratat e tij për hapjen e kufirit janë vetëm premtime të kota. DR-ja klërkon nga Qeveria dhe MPJ-ja qasje serioze për hapjen e vendkalimeve kufitare në Komunën e Likovës.
“Duke e ditur se komuna e Likovës është komunë rurale dhe një ndër komunat më të pazhvilluara  në Maqedoni, qytetarët e kësaj komune kryesisht merren me bujqësi, prodhimet e kultivuara nuk do të kenë të drejtë që t’i kalojnë përmes këtij kufiri dhe ti shesin ne tregun Kosovar”, theksoi Xhabir Islami, kryetar i këshillit komunal të DR-së në Likovë.
Por, Sekretari shtetëror në Ministrinë e jashtme Abdulkadër Memeti, akuzat e DR-së i quajti të pabaza. Sipas Memetit, komisioni për kalime kufitare ka vepruar në bazë të kërkesës së banorëve. Ai tha se procedura dhe kushtet për qarkullim mallrash nuk janë të pamundura, ajo mund të bëhet pas hapjes së kalimit kufitar, me kategorizimin e kufirit.
“Qëllimi dhe synimi jonë është që të plotësojmë kërkesat e banorëve dhe qytetarëve tonë, tu mundësojmë qarkullim të lirshëm dhe në asnjë mënyrë qëllimi dhe synimi jonë nuk është të merremi me akuzat e atyre që kur janë në opozitë kërkojnë gjëra të cilat kur kanë qenë në pozitë as që u ka shkuar ndërmend. Prandaj veprimet serioze, faktet dhe puna e bërë nuk janë gjëra që mund të mohohen me një press-konferencë të dhënë nën hijen e dardhës”, u shpreh përmes telefonit Abdulkadër Memeti – sekretar shtetëror në MPJ.
Debati për hapjen e kalimit kufitar në Bellanoc, që lidh Maqedoninë me Kosovën u aktualizua pas publikimit të informatave në Alsat-M për ngecjet në hapjen e pikës kufitare Bellanoc-Stançiq.

Shkëlzen Aqifi