Kanali i ndotur, kreu i Haraçinës përgënjeshtron ministrin

‘Gënjeshtra...’, kështu i ka cilësuar kreu i komunës së Haraçinës, Bastri Bajrami, vlerësimet e një dite më parë të ministrit të Ekologjisë Nexhati Jakupi, lidhur me kanalin në Haraçinë. Pakënaqësitë e tyre sërish i shprehën edhe banorët të cilët madje e ftuan ministrin Jakupi që të vizitoj Haraçinën dhe të njihet me situatën dhe të mos prononcohet nga kabineti tij apo nga Hasanbegu.
“Unë kisha apeluar deri te ministri kur të donë edhe në TV duel mund të dalim po edhe le të vjen këtu, le të ballafaqohet me problemet, me helmimet që na bëhen neve këtu në komunën e Haraçinës e jo vetëm ai të mban prese në kabinetin e vet ose në Hasanbeg ku ishte dje. Unë do ti tregoj publikisht se unë dy herë e kam pastruar këtë kanal dhe atë me mjetet e mia e jo të komunës se e dimë ne se çfarë buxheti ka komuna e Haraçinës edhe unë marrë masa, por ai duhet fondet që janë për vendet tona, posaçërisht komunat rurale shqiptare që jemi të prapambetura, në shekullin 21 jemi po neve na kanë kthy në shekullin 19. Apelojë edhe njëherë të del këtu të ballafaqohet me problemin me qytetarët e më tutje do të shohim se ne çka do të bëjmë”, theksoi Basri Bajrami, kryetar i komunës së Haraçinës.
“Po ai ministri duhet të vijë këtu me pa situatën, se nuk e kemi vendos aty të shoh hënën, po këto punë t’i shoh, as diellin nuk ka me vizatu, as te dielli nuk mund të shkon e as te hëna, po kanalin le të vjen e le ta shikoj e njerëzit këtu”, tha një banor.
“Nuk vjen ai kurrë këtu, nuk vjen, ai vjen veç at ditë kur duhet me i marrë votat, vjen në Haraçinë këtu, i lyp votat edhe ma të pafsha në qafë. Marre është, se nuk është kjo punë partie që kemi dal. As kryetari i komunës nuk ka dal për veti, për krejt. Dy-tre mijë fëmijë mësojnë aty, ju bje topi në ujë, shkojnë pas topit, faqja e zezë, krejt në ambulance përfundojnë, sëmundja ka ra, epidemia”, u shpreh një banor tjetër.
“Fëmijët tanë ne nuk i dërgojmë në shkollë para se mu pastrua ky kanal. Unë 6 fëmijë i kam, për çdo ditë nuk mundë ti dërgoj nëpër spitale prej pa pastërtisë, është poshtërsi, në çfarë shekulli jemi, a ban me protesta të shkojmë në Evropë, atje nuk shkohet me këtë pisllëk”, shtoi një banor tjetër.
Një ditë më parë ministri Jakupi i ekologjisë, Nexhati Jakupit deklaroi problem me kanalin e Haraçinës do të zgjidhet pasi të ketë përfunduar ndërtimi i kanalizimit të ujërave të zeza në Hasanbeg prej nga edhe derdhen ujërat e zeza në kanalin e Haraçinës. Ministri Jakupi tha se kryetari i komunës së Haraçinës ka qenë i informuar për projektin ndërsa e ftoi që edhe ai të jep kontribut dhe të marrë pjesë në pastrimin e kanalit.

Melihate Rustemi