Libri me gabime “Shoqëria”, kthehet në rishqyrtim

Libri “Shoqëria” e klasës së pestë e cila u botua me gabime, pas shumë reagimeve është kthyer në rishqyrtim. Është formuar ekip i ri i recensentëve, i cili do të rishqyrtojë nga e para gabimet në këtë libër, ndërsa në të njëjtën kohë shpërndarja e librit është ndërprerë. Ministri i arsimit dhe shkencës Nikolla Todorov tha se ndjen përgjegjësi, por nuk është fajtor për gabimet në libër.
“Po, ndjej përgjegjësi, por bëj edhe krahasim mes asaj që të jesh përgjegjës dhe të jesh fajtor. Dua të them gjithashtu se menjëherë komisioni kombëtar për tekste formoi ekip të ri të recensentëve, të cilët do të bëjnë super-recension për këtë libër, ndërsa gjatë gjithë kësaj kohe, libri nuk do të shpërndahet”, deklaroi Nikolla Todorov – ministër i Arsimit dhe Shkencës.
Zëvendësministrja e arsimit dhe shkencës Lindita Qazimi tha se Komisioni kombëtar i themeluar nga qeveria, në bazë të ligjit për tekstet shkollore, është dashur ta kthejë në rishqyrtim librin në momentin që kanë vërejtur gabimet, pasi një gjë të tillë u garanton ligji. 
“Ne si ministri nuk do të kërkojmë përgjegjësi nga anëtarët e komisionit nacional për arsye se ata janë më kompetentët ku edhe me ligj, pavarësisht se ndaj një teksti shkollor, komisioni recensues jep vlerësim pozitiv, i njejti tekst pastaj kalon deri tek komisioni nacional i cili e ka të drejtën e sugjerimeve mendimeve dhe ka të drejtë ta kthejë tekstin prapë në rishqyrtim pavarësisht vlerësimit të parë pozitiv që është bërë nga ana e komisionit recensues”, theksoi Qazimi.
Në librin “Shoqëria” e klasës së pestë Republika e Kosovës është paraqitur si pjesë e Serbisë. Përveç gabimeve lidhur me Kosovën dhe kulturën shqiptare në këtë tekst shkollor janë bërë gabime edhe me kulturës maqedonase. Libri me të gjitha këto gabime rreth shtetësisë së Kosovës është kontrolluar nga komisioni 21 anëtarësh në të cilin bëjnë pjesë edhe 4 shqiptarë: Vebi Kadriu, Dervish Kamberi, Sali Emini dhe Qani Haliti. Përmbajtjen e re të librit “Shoqëria”, do ta shqyrtojnë anëtarët e njëjtë të komisionit kombëtar.

Shkëlzen Aqifi