Ademi: Nuk do të ketë rikonstruksion të qeverisë

Burime brenda BDI-së bëjnë të ditur se shkarkimi i zëdhënësit qeveritar Shefik Duraku mund të hapë rrugën e rikonstruksionit të Qeverisë, i cili pritet të përfundojë deri në shtator. Të njejtat burime bëjnë të ditur për Alsat-M se rikonstruksioni i qeverisë do të bëhet në formën e dorëheqjeve të ministrave dhe zëvrndësministrave. Në listë përfliten ministri i ekologjisë Nexhati Jakupi, ai i sociales Xhelal Bajrami, zëvendësministrja e arsimit Lindita Qazimi dhe zëvendësministri i brendshme Xhevat Buçi.
I pyetur për shkarkimin e zëdhënsit të Qeverisë, zëvendëskryeministri Ademi tha se qeveria ka respektuar vendimin e partisë. Ndërsa hodhi poshtë zërat për rikonstruksion të qeverisë duke i cilësuar ato si informacione që tentojnë të fusin përçarje dhe pakënaqësi brenda BDI-së.
“Vendimi është marrë atje ku duhet të merret dhe ai vendim është respektuar nga qeveria. Deri tani janë dhënë vlerësime pozitive por edhe në të ardhmen nëse eventualisht do të vendoset për të pasur ndonjë ndryshim në kabinetin qeveritar përsëri në bazë vlerësimit, vendimet do të merren në organet partiake. Për momentin nuk ka të thirrur ndonjë mbledhje të kryesisë qendrore për të vlerësuar punën e ministrave dhe besoj se edhe në periudhën e afërt nuk do të ketë mbledhje e cila do të jetë e caktuar për të vlerësuar punën e ministrave dhe për të biseduar për rikonstruimin e ardhshëm të qeverisë”, deklaroi Ademi.
Ndërkohë zëdhënësi i shkarkuar i qeverisë Shefik Duraku, tha se ndryshimet gjithsesi duhet të shihen si pozitive.
“Shefik Duraku është themelues i BDI-së, ka qenë funksionar i lartë i BDI-së edhe më tej do të jetë funksionar i lartë i BDI-së. Konsideroj se ndryshimet çdoherë duhet të shihen si pozitive”, ka thënë Duraku në një prononcim për Alsat.
Pas vendimit të mbrëmshëm për shkarkimin e zëdhënësit të qeverisë Shefik Duraku, në vend të tij qeveria ka emëruar sot Muhamet Hoxhën, i cili vjen nga sekretariati për implementimin e Marrëveshjes së Ohrit.

Shkëlzen Aqifi