Deputeti Besim Dogani braktisi radhët e DR-së

Demokracia e Re e Imer Selmanit mbeti pa grup parlamentar, si rezultat i braktisjes së radhëve nga kjo parti të deputetit Besim Dogani. Në intervistën për mediat, Dogani tha se nuk dëshironte më të ishte dekor dhe dorë e zgjatur e Nikolla Gruevskit. Ai akuzoi edhe institucionin më të lartë ligjvënës, Kuvendin se gjithnjë e më shumë po miraton ligje anti-shqiptare.
“Kam menduar thellë që krejtësisht të braktis mandatin e deputetit, por në bisedë me përkrahësit e mi, me shok e miq, mu sugjerua që për momentin të braktis vetëm prangat dhe politikat partiake dhe të jem deputet i votuesve, i qytetarëve të mi shqiptarë. Unë sikurse edhe votuesit e mi nuk pranojë të jem dekor i Nikolla Gruevskit dhe apetiteve të shumicës parlamentare në Kuvend. Unë kam vetëm një shef, shefi im janë votuesit e mi, shefi imë është populli shqiptar në Maqedoni. Ndërsa kuvendi nuk punon në të mirën e popullit shqiptar në Maqedoni”, deklaroi Besim Dogani, deputet i pavarur. 
Dogani paralajmëroi se në punimet e parlamentit do të marrë pjesë si deputet i pavarur dhe në mënyrë selektive, vetëm atëherë kur në rend dite do të jenë tema dhe propozime serioze për përmirësimin e statutit të shqiptarëve dhe afrimit të vendit drejt BE-së. Por Dogani, nuk përjashtoi edhe mundësinë e tërheqjes së plotë nga politika.
“Nëse politikë-bërja në Maqedoni nuk pëson ndryshime radikale pozitive, atëherë opsion shumë i mundshëm në të ardhmen e afërt do të jetë përfundimi i karrierës sime politike. Mbetem në shërbim të popullatës shqiptare, në shërbim të atyre që më dhanë mandatin ti përfaqësoj në kuvendin e Republikës së Maqedonisë”, shtoi Dogani.
Vendimi i tillë i Doganit ka befasuar DR-në. Nga kjo parti nuk deshën të prononcoheshin për media, por vetëm theksuan se për dorëheqjen janë informuar nga mediat dhe se akoma nuk kanë ndërtuar qëndrim partiak.

Bedri Rexhallari