Zhbllokohet puna e Komitetit për marrëdhënie mes bashkësive

Pas dështimit të 4 seancave, komiteti për marrëdhënie mes bashkësive arriti të zhbllokoj punën, por jo edhe të debatoj për temat e paralajmëruara më herët për të cilat kishte reagime të shumta. Pikërisht raporti i avokatit të popullit për përfaqësimin e drejt dhe adekuat të bashkësive etnike ishte tema që mblodhi anëtarët  e komitetit. DR kërkoi që rendi i ditës të plotësohet edhe me temat e dështuara, si mësimi i maqedonishtes nga klasa e parë për nxënësit shqiptar, mungesa e pasaportave në gjuhën shqipe dhe projekti “ Shkupi 2014”, por ky propozim u refuzua nga kryetari i komitetit me arsyetim se kjo është seancë e re ndërsa temat e propozuara do të debatohen në të ardhmen.
“Ju zoti kryetar a keni harruar apo qëllimisht nuk keni dëshiruar ti përfshini edhe temat tjera të cilat ishin tema shumë problematike, tema të cilët krijuan një pakënaqësi shumë të madhe qoftë qytetare, qoftë kombëtare, qoftë fetare në Maqedoni. Nuk e di zoti kryetar a keni marrëveshje të fshehur me deputetët të cilët deri më sot e bojkotonin punën e komitetit që mos t’i futni këto pika të rendit të ditës por të futni pikën e përfaqësimit të drejtë dhe adekuat”, deklaroi Besim  Dogani anëtar i Komitetit, nga radhët e DR-së.
“Dua ti eliminoj të gjitha dilemat, marrëveshje nuk kam bërë me askënd, me çdo njërin kamë biseduar, kam biseduar për të gjetur zgjidhje, për të filluar të funksionoj komiteti duke marr obligim publik që për seancat e filluara të mos sillemi sikur i kemi harruar”, u përgjigj Xhevat Ademi, kryetar i Komitetit për marrëdhënie mes bashkësive.
Edhe LSDM kërkoi që propozimet e dhëna nga ana e deputetëve të vihen në votim me çka do të shihet qartë nëse anëtarët e komitetit janë për dialog apo politik. Ndërsa VMRO-DPMNE ka përshëndetur punën e kryetarit të Komitetit.
“Mendova se është në rregull që anëtarët e komitetit të deklarohen rreth cilitdo propozim për plotësim të rendit të ditës. Ata do të tregojnë nëse dëshirojmë apo jo dhe atëherë do të shihnim nëse jemi për dialog apo për politik“, tha Nikolla Qurçiev, anëtar i komitetit nga radhët e LSDM-së.
“Sa i përket sjelljes së kryetarit, unë nuk dëshiroj ta lavdëroj kryetarin megjithatë të gjithë e dini se angazhimet e tij ishin maksimale që komiteti të qëndroj në kufijtë e ligjit”, tha Zhivko Pejkovski, anëtar i komitetit nga radhët e VMRO-DPMNE-së.
Ndryshe, sipas raportit të avokatit të popullit i cili përfshin 60% të institucioneve shtetërore dhe publike, në 100 institucione nuk ka të punësuar asnjë përfaqësues shqiptar apo të ndonjë etniteti tjetër jo shumicë në Maqedoni.

Gjyltene Rexhallari