Gosivar, merren masa për tejkalimin e problemit të ujit

Javën e ardhshme fillojnë punimet për zgjidhjen e problemit të ujit të pijshëm në Gostivar. Ky ishte konkluzioni i dalë pas takimit të ministrave të Ekologjisë dhe Transportit, Nexhati Jakupi dhe Mile Kanakievski me kryetarin e komunës së Gostivarit Rufi Osmani.
“Ne prej javës së ardhshme fillojmë punët përgatitore dhe për dy deri në tre javë do bëjmë edhe hedhjen e gurthemelit për fillimin e punëve dhe paralelisht me ndërtimin e ujësjellësit apo gypave ne do ti bëjmë edhe projeksionet për ndërtimin e stacionit filtrues dhe do vendosim se cila do jetë teknologjia përfundimtare që do vendoset dhe do fillojnë furnizimet publike”, deklaroi Nexhati Jakupi, ministër i Ekologjisë.
“Informacionet e mbledhura sot, bashkë me ministrin e Ekologjisë do t’i prezantojmë para qeverisë së Maqedonisë. Më pas në bashkëpunim me pushtetin vendor do të marrim vendim se si do vazhdojmë më tej”, u shpreh Mile Janakievski, ministër i Transportit.
Puna e parë që do bëhet është vendosja e tubacioneve që do sjellin ujin deri tek filtri prej nga do të bëhet shpërndarja e ujit.
“Me këtë investim që do realizohet që e përmendi ministri i Ekologjisë, defakto do bëhen punët ndërtimore, vet projekti i stacionit filtrues kushton dy milion e dyqindmijë euro ose në total tre milion euro, që të mundë të rumbullakësohet komplet ky problem, dhe ne presim që brenda dy viteve të zgjidhet ky problem dhe qytetarët e Gostivarit të mos e kenë më problemin e ujit për pije. Ngelim me shpresë se qeveria do i sigurojë këto para”, u shpreh Rufi Osmani, kryetar i komunës së Gostivarit.
Realizuesi i projektit është zgjedhur firma “Pellagonia” nga Gostivari me të cilën pritet të nënshkruhet kontrata dhe të fillojnë punët rreth realizimit të këtij projekti i cili ka filluar në vitin 1991.
Problemi me ujë të pijshëm në Gostivar, u paraqit pasi që në burimin e Vrutokut papritmas para katër ditësh filloi ndotja e ujit. Dhe për shkak të mungesës së filtrave që do ta pastronin ujin, gjendja u bë edhe më alarmante.  

Bashkim Sulejmani