Danilo Turk: Ivanovi dhe Papoulias të takohen për emrin

Presidenti i Sllovenisë Danilo Turk, i bëri thirrje kolegëve të tij nga Maqedonia dhe nga Greqia që të takohen për të diskutuar për çështjen e emrit. “Pas takimit të kryeministrave Gruevski dhe Papandreou, bisedimet direkte për zgjidhjen e çështjes së emrit duhet të vazhdojnë dhe të ngrihen në shkallën më të lartë mes dy vendeve. Radhën tashmë e kanë presidentët Ivanov dhe Papoulias të cilëve unë iu bëj thirrje takohen për këtë çështje”, deklaroi Presidenti slloven në një takim me korrespondentët e mediave të Ballkanit nga Brukseli.
I pyetur se çfarë mendon për deklaratat e Komisionerit të ri për zgjerimin Stefan Fule, se BE nuk duhet të ndërhyjë për çështjen e emrit, Turk e mbështeti fuqishëm këtë ide. “Eksperienca botërore ka treguar se shtimi i një kanali tjetër ndërmjetësimi ndaj atij që ekziston nuk ndihmon. Nuk ka nevojë që të ketë mediatorë të tjerë përveç Methju Nimetz. Ajo që nevojitet është vetëm rritja e komunikimit mes dy palëve për të zbutur dallimet mes tyre”, deklaroi Turk.
Për zënkën greko-maqedone mbi emrin, presidenti slloven shtoi se zgjidhjen e këtij problemi nuk e ndihmon retorika dhe kthimi i syve nga historia antike. “Edhe eksperienca të tjera në botë kanë treguar se problemet kontemporane nuk zgjidhen me argumente të bazuara mbi historinë antike”, këshilloi presidenti slloven.
Ai u takua në Lubjanë me korrespondentët e Ballkanit nga Brukseli, dy ditë para samitit që Sllovenia bashkë-organizon me Kroacinë me liderët e Ballkanit. “Ka ardhur koha që këta liderë bisedojnë në mënyrë direkte me njëri tjetrin, pa ndërhyrjen e evropianëve”, vlerësoi Presidenti slloven në lidhje me takimin që organizohet me iniciativën e kryeministrit të këtij vendi dhe homologut të tij kroat.
Danilo Turk sqaroi se në samitin e të shtunës në Slloveni nuk janë ftuar grekët pasi synimi i këtij samiti është takimi i liderëve të rajonit të Ballkanit mes tyre për integrimin e rajonit në BE e jo vetëm diskutimi i temave vetjake të secilit vend. Takime mes Maqedonisë dhe Greqisë, sipas Turk, do të organizohen në samite dhe takime të tjera të nivelit të lartë që përfshin procesi i vazhdueshëm integrues i Ballkanit.

Nga i dërguari ynë në Lubjanë
Ernest Bunguri