Liqeni i Ohrit rrezikohet nga ujërat e zeza

Autoritetet vendore në Ohër dhe Strugë paralajmërojnë se një pjesë e madhe e liqenit të këtë verë nuk do të jetë i përshtatshëm për t’u larë. Shkak për këtë do të jenë sasitë e mëdha të ujërave të zeza të cilat për shkak të mos funksionimit të stacionit për pastrim në Vranishtë dhe në tërë sistemin kolektor, derdhen drejtpërdrejt në ujërat e liqenit.
‘Për shkak të kësaj, uji i liqenit të Ohrit nuk do të rekomandohet për larje. Për shkak të kësaj, uji do të jetë i kategorisë së dytë dhe të tretë dhe për këtë duhet të vendosen tabela se uji nuk është i përshtatshëm për larje. Kjo është dita e 61-të ku liqeni po ndotet me përqindje aq të lartë të ujërave të zeza’, deklaroi Vait Ajro, udhëheqës në sistemin e kolektorit.
Mirëpo, ekspertë të entit hidrobiologjik në Ohër porosisin të mos krijohet panik i panevojshëm në opinion. Ata thonë se liqeni ka qindra burime nëntokësore dhe sipërfaqësore, por edhe me mundësi natyrore për vetëpastrim. Për çdo rast nga disa lokalitete janë marrë kampion të ujit në sipërfaqe. Enti shton se përgjegjësinë për të gjithë atë që ndodhi për shkak të mosfunksionimit të sistemit të kolektorit dhe të stacionit të pastrimit, do të duhet të bjerë mbi drejtorinë e ndërmarrjes publike Proakua qe menaxhon tërë sistemin. Ndërkaq kryetari i komunës së Strugës, tërhoqi vërejtjen sot se për shkak të nivelit gjithnjë e më të lartë të Drinit të Zi akoma ekziston mundësia për keqësimin e gjendjes në disa pjesë të qytetit dhe zonat përreth.
‘Qeveria, përkatësisht shteti po e shfrytëzon liqenin e Ohrit. Ujin po ua jep hidrocentraleve dhe po bëjnë fitime të mëdha. Nga këto fitime deri më sot nuk është kthyer asnjë denar në investimin e sistemit të kolektorëve, e as në energjinë e shpenzuar elektrike’, tha Ramiz Merko, kryetar i komunës së Ohrit.
Ndërkaq, javën e ardhshme me kërkesë të ministrisë së transportit, kryetarët e komunave të Ohrit dhe Strugës do të vijnë në Shkup që të takojnë ministrin Mile Janakievski. Dikasteri ka thënë se po përhapen të pavërteta dhe frikë, në vend që të zgjidhen problemet.

Miki Trajkovski