Buçkovski: Të miratohet ligj i posaçëm për amnistinë e sopotasve

Ish ministri Mbrojtjes,Vllado Buçkovski, i cili para Komisionit anketues mbrojti pafajësinë e sopotasve, tani u rekomandon partive politike shqiptare të kërkojnë nga kryeministri Nikolla Gruevski të miratohet një ligj i posaçëm për amnisti, me çka do të liroheshin të gjithë të akuzuarit e rastit të Sopotit.
“Vendimi i Gjykatës së Apelit është i plotfuqishëm, ekipi i avokatëve të tyre tani duhet që ta vazhdojë betejën para Gjykatës Supreme, kurse deputetët, e kam fjalën për kolegët nga Demokracia e Re dhe BDI-ja, nëse dëshirojnë që në mënyrë shumë reale të testojnë se si funksionon Nikolla Gruevski, ngel vetëm një mundësi, të miratojnë një ligj dhe të amnistohen këta njerëz. Variant tjetër realisht nuk ekziston”, deklaroi Vllado Buçkovski – deputet i LSDM-së.
Por, deputeti i BDI-së Safet Neziri, konsideron se amnistia duhet të jetë hapi i fundit që do të përdoret, pasiqë me një ligj të tillë do të pranohej fajësia e tyre. 
“Amnistia do të thotë se ata janë të fajshëm, por po i lirojmë nga fajësia me amnisti. Siç e dimë të gjithë se amnistia tregon se është i fajshëm, por po i lirojmë. Ne të gjithë e dimë se të dënuarit dhe ata që po e vuajnë burgimin të rastit të Sopotit, janë të pafajshëm definitivisht”, u shpreh Neziri.
Por partitë politike shqiptare kanë paralajmëruar mbështetjen e mëtutjeshme të personave të dënuar nga Sopoti dhe shpresojnë se atë që nuk mori parasysh Gjykata e Apelit tani do të shqyrtojë Gjykata Supreme e cila është instanca e vetme që mund të kthej nga fillimi procesin gjyqësor për rastin e Sopotit.
“Partitë politike shqiptare duhet të jenë më të zëshme, duhet të ngrejë zërin pak më fuqishëm varësisht edhe nga pozicionet që i kanë si parti politike për shkak se me rastin e Sopotit dëshmohet edhe njëherë se për shqiptarët në Maqedoni absolutisht nuk ka ndryshuar asgjë, siç kanë ndodhur raste të montuara në 70 vjetorin e kaluar e të hidhur të shqiptarëve ashtu po na ndodhin edhe sot”, u shpreh Sulejman Rushiti – deputet i DR-së.
“Ne edhe mëtutje si BDI do ta mbështesim ankimimin dhe procesuimin deri në Gjykatën Supreme që të kemi një gjykim real, në bazë të fakteve dhe argumenteve”, tha Safet Neziri – deputet i BDI-së.
Ndërkohë, vetëm VMRO-DPMNE refuzoi ta komentojë vendimin e Gjykatës së Apelit me arsyetimin se do të deklarohen vetëm atëherë kur edhe do ta kenë në formë të shkruar akt-vendimin gjyqësor.

Valmir Kuçi