Ahmeti vlerësoi vizitën e Metës në Serbi

Kryetari i BDI-së Ali Ahmeti e vlerëson lartë vizitën e zëvendëskryeministrit shqiptar Ilir Meta që kohë më parë i bëri Beogradit zyrtar. Ahmeti vizitën e Metës në Beograd e sheh në vijë të fqinjësisë së mirë dhe kontributit për paqe dhe stabilitet në rajon. Ai tha se vendet e Ballkanit Perëndimor duhet të ecin para drejtë Evropës, por se një gjë të tillë, nuk mund ta bëjnë duke kujtuar historinë.
“Mendoj që vizita e zotit Meta në Beograd është një kontribut i Shqipërisë në forcimin e raporteve me vendet e rajonit apo të Ballkanit perëndimor. Synim i të gjithëve është që edhe ky rajon më në fund të marrë rrugën e integrimit të plotë si në NATO ashtu edhe në Bashkimin Evropian. Mendoj se me hasmëri shekullore nuk mund të arrihet as paqe, as siguri e s stabilitet”, u shpreh Ali Ahmeti, kryetar i BDI-së.
Pas vizitës në Beograd, zëvendëskryeministri shqiptar Ilir Meta ka realizuar një takim me kryetarin e BDI-së Ali Ahmeti. Ky i fundit, tha se për Alsat  se me zotin Meta ka biseduar për çështjet që kanë të bëjnë me procesin integrues të rajonit në NATO dhe Bashkimin Europian.
“Parimisht kemi biseduar për nevojën dhe punët që duhet të realizohen në drejtim të avancimeve të mëtejshme për integrimin e rajonit në NATO dhe Bashkimin Europian. Ka qenë një takim miqësor, sigurisht që kemi biseduar për shumë çështje, kemi biseduar edhe për vizitën që ka realizuar zoti Meta në Serbi, por edhe për një vizitë të mundshme të zotit Meta në Maqedoni. Gjithashtu dëgjova impresionet e zotit Meta për pritjen që i ka bërë komuniteti shqiptar në Luginën e Preshevës”, vlerësoi Ahmeti.
Zëvendës kryeministri shqiptar Ilir Meta gjatë qëndrimit të tij në Beograd u takua me  presidentin serb Boris Tadiq, shefin e diplomacisë serbe Vuk Jeremiq, dhe zv/ kryeministrin serb, Bozhidar Djeliq. Bisedimet u fokusuan në marrëdhëniet ndërmjet dy vendeve, stabilitetin në rajon dhe integrimin e shteteve të Ballkanit në Bashkimin Evropian dhe NATO.

Bedri Rexhallari