Përkujtohen demonstratat e vitit 1981, zbulohet pllaka në nder të dëshmorit Mursel Ahmeti

Viktimat e demonstratave të 1981 në Prishtinë, u kujtuan sot në Shkup, me një akademi përkujtimore. 29 vjet pas protestave të përgjakshme, shqiptarët mbeten ende larg të drejtave të barabarta. Veprimtari i njohur i çështjes kombëtare nga Kosova, Adem Demaçi tha se politikanët tanë nuk duhet të bëhen pre e interesave ditore, por të punojnë për popullin nga i cili kanë marrë verdiktin.
“Të gjitha shkojnë e vijnë, shkojnë edhe Hasanat e Hysenat e të tjerët, shkojnë edhe partitë njëra pas tjetrës, por kombi mbetet. Prandaj le të investojmë le të sakrifikojmë për interesin e kombit nëse nuk duam që të harrohemi dhe nëse nuk duam që të vdesim. Vëllezërit tanë që janë të instaluar nëpër pushtete në të katër anët e hapësirës shqiptare në rend të parë kur të ngrihen në mëngjes të mendojnë, çfarë duhet të bëj diçka për kombin tim!”, tha Adem Demaçi, veprimtar i njohur kombëtar.
“Të sharat e Adem Demaçit na bëjnë mirë sepse na shanë në gjuhën shqipe që ne të jemi edhe më të mirë sepse na do shumë dhe njeriun që të qorton duaje, mos e duaj atë që të lavdëron. Këto të arritura sigurisht që janë me sakrifica të panumërta, sigurisht që i vranë dhe u vranë shqiptarët për lirinë e vet, por ama pushtuesit një gjë nuk e arritën, nuk arritën të vrasin truallin shqiptar, truallin që ushqen shqiptarët, këtë nuk e arritën dot dhe bijt e vet këtë truall e çliruan”, u shpreh Ali Ahmeti, kryetar i BDI-së.
Ndërkohë, para Muzeut të Lirisë në Shkup u zbulua pllaka përkujtimore në nder të dëshmorit kombëtar, Mursel Ahmeti, djalit të Ahmet Delisë, i cili në vitin 1931 u soll i plagosur në Shkup dhe më pas u helmua. Kreu i Komunës së Çairit, Izet Mexhiti tha se zbulimi i kësaj pllake përkujtimore është një hap drejt kthimit të të gjitha simboleve shqiptare në kryeqytetin e Vilajetit të Kosovës, Shkupin. .
“Sot në Shkup kemi një atmosferë festive, kjo ndjehet edhe tek qytetarët por edhe tek ne si funksionar bashkë me familjarët e Mursel Ahmetit dhe jo rastësisht zgjodhëm proverbin popullor tek pllaka përkujtimore “Gjaku u bëftë dritë”. Ne aty e kemi vendos sepse gjaku i tij u bë dritë. Shkupit dardan dalëngadalë po ia kthejmë simbolet dhe të gjithë ato që një kohë janë shënuar në kryeqytetin e Vilajetit të Kosovës”, tha Izet Mexhiti, kryetar i Komunës Çair.
“Falënderoj që ma mundësoi Zoti me ardh dhe ta zbuloj pllakën e tij sot në Shkup pas 70 viteve që kur ka ndëruar jetë këtu në Shkup dhe me këtë rast falënderoj gjithë popullin, ata që kanë kontribuar për këtë ditë, për këtë komb e për këtë flamur”, tha Adem Ahmeti, nipi i Mursel Ahmet Delisë.
Gjatë Akademisë përkujtimore të 29 vjetorit të fillimit të demonstratave të vitit 1981, morën pjesë dhe anëtarë të familjes së Adem Jasharit, Ahmet Delisë dhe Tahir Mehës si dha dy ambasadorët, ai i Shqipërisë Arben Çejku dhe ai i Kosovës në Shkup dhe Skënder Durmishi.

Valmir Kuçi