Takimi i liderëve përfundoi pa marrëveshje

Nuk u arrit ndonjë marrëveshje konkrete gjatë takimit të liderëve të katër partive më të mëdha politike, ku u diskutua për ndryshimet kushtetuese në pjesën e Këshillit Gjyqësor Republikan. Kryeministri Gruevski njohur krerët e partive me ndryshimet kushtetuese, që sipas tij rrisin efikasitetin në Gjyqësor. Ndërkohë kryetari i LSDM-së Branko Cërvenkovski kërkoi në formë të shkruar propozimin konkret që të mund të vendos për të.
“Sot u diskutua për gjithçka. Kishte vërejtje se çfarë ndodh nëse hapen edhe iniciativa të tjera. Ne jemi të gatshëm t’i dëgjojmë. Kjo nuk do të thotë se duhet edhe t’i pranojmë të gjitha iniciativat e tjera. Në fund u kërkua nga ana e Cërvenkovskit që t’i prezantojmë në formë të shkruar se si do të dukej versioni final i tekstit i cili do të miratohej. Zoti Selmani dha gjithashtu disa propozime duke përfshirë edhe disa ndryshime të tjera në kushtetutë. E pyeta se a janë këto në Marrëveshjen e Ohrit, ai tha se nuk janë. Unë këtë e kuptoj më shumë si nevojë për ndërrimin e Marrëveshjes së Ohrit, që mendoj se nuk është koha e duhur për këtë” deklaroi pas takimit kryeministri Nikolla Gruevski.
“Në takimin e sotëm dëgjuam vetëm një paraqitje të shkurtër gojore nga ana e kryeministrit, ku ai theksoi vetëm disa pika kryesore dhe pa zgjidhje konkrete, që propozohen për ndryshime të kushtetutës. U konkludua që, para takimit të ardhshëm të liderëve, nga ana e iniciatorëve do të na dorëzohet dokumenti i shkruar për të cilin do të mund të deklarohemi”, u shpreh Branko Cërvenkovski, kryetar i LSDM-së.
Lideri i BDI-së Ali Ahmeti ndonëse prezent në takim, nuk u prononcua për median mbi qëndrimin e partisë së tij lidhur me ndryshimet kushtetuese, megjithatë mësohet se Ahmeti ka kërkuar nga Selmani që kërkesat e DR-së për ndryshime shtesë në kushtetutë t’i parashtroj në formë të shkruar.
“Kryeministri pati pyetje drejtpërdrejt se a është kjo pjesë e rregulluar me Marrëveshjen e Ohrit përgjigja ime është shumë konkrete se Marrëveshja e Ohrit ka pjesët e shkruara por ka edhe frymën e vet dhe ka mekanizmat mbrojtës ndaj mbivotimit. Parimi i Badenterit apo votimi i dyfishtë është një parim si vlerë e lartë e Marrëveshjes së Ohrit dhe kjo duhet gjithsesi të implementohet edhe në vendimet e gjykatës kushtetuese”, u shpreh Imer Selmani, kryetar i DR-së.
Ndryshimet në kushtetutë parashikojnë rritjen e numrit të anëtarëve të Këshillit gjyqësor republikan, heqjen e të drejtës ministrit të drejtësisë që të jetë anëtarë i Këshillit gjyqësor republikan si dhe shkurtimin e mandatit nga 6 në 4 vjet. Këto ndryshime, sipas kryeministrit Gruevski, shmangin presionet e ndryshme ndaj gjyqësorit.
 
Bedri Rexhallari