Përplasje midis BDI-së dhe DR-së për Komitetin ndëretnik

Kanë vazhduar përplasjet mes Demokracisë së Re, dhe Bashkimit Demokratik për Integrim rreth Komitetit për marrëdhënie ndëretnike i cili nuk ka arritur të debatoj për iniciativat e partisë së Selmanit për projektin ‘Shkupi 2014’ , për mësimin e maqedonishtes nga klasa e parë dhe për çështje tjera që kanë të bëjnë më raportet ndëretnike. Nga partia e Selmanit thonë se mosfunksionimi i Komiteti është pasojë e marrëveshjes mes partnerëve të koalicionit qeveritar BDI dhe VMRO-DPMNE.
“Pyesim publikisht BDI-në se vallë a nuk dëshmon kjo se është një skenar i përgatitur paraprakisht mes VMRO-DPMNE-së dhe BDI-së, që pikërisht Komiteti për marrëdhënie ndëretnike të mos funksionoj pranë Kuvendit të Maqedonisë. Pyesim gjithashtu publikisht se vallë me këtë mënyrë të veprimit në Kuvendin e Maqedonisë BDI-ja mbron interesat e popullit shqiptar”, deklaroi Flora Kadriu, kryetare e grupit parlamentar të DR-së.
Por kryetari i Komitetit, Xhevat Ademi hedh poshtë akuzat e DR-së, duke thënë se Komiteti për marrëdhënie në mes bashkësive etnike nuk është institucion që lejon marrëveshje ndërpartiake.
“I porosis propozuesit e këtij ndryshimi se nga 19 anëtarë sa numëron komiteti 10 janë nga lista e VMRO-DPMNE-së, 5 maqedonas dhe 5 jo maqedonas dhe jo shqiptarë. Të gjithë pa përjashtim janë nga lista e VMRO- DPMNE-së. Me gjithë vullnetin e mirë, për të kuptuar motivin për ndryshime, nuk e di se kush në të vërtetë qëndron pas kësaj iniciative. Forumi prej 10 anëtarësh komitetin do ta kishte bërë vegël të VMRO-DPMNE-së, dhe këtë nuk arrij ta kuptoj se si nuk e kuptojnë propozuesit e Demokracisë së Re”, u shpreh Xhevat Ademi, kryetar i Komiteti për marrëdhënie ndëretnike.
Ademi ka njoftuar se për të zhbllokuar punën e komitetit do të realizoj takime me ambasadorin e OSBE-së  Hoze Luis Herero, me atë të BE-së Ervan Fuere dhe të SHBA-vë Filip Riker. Ndryshe në seancën e radhës Ademi tha se ka planifikuar që të ftoj kryeministrin Gruevski, zëvendëskryeministrin Ademi, si dhe ambasadorët e lartpërmendur që të marrin pjesë në seancën e radhës të Komitetit për marrëdhënie ndëretnike.

Bedri Rexhallari