Sekretari belg për migrimin, vizitoi rajonin e Likovës

Nuk ka azil për qytetarët e Maqedonisë në Belgjikë. Banorët e rajonit të Kumanovës dhe Likovës janë gënjyer, të gjithë do të kthehen në vendlindje. Kështu deklaroi sot nga komuna e Likovës sekretari shtetëror belg për migrimin Melkro Vatele, i cili qëndroi për vizitë të shkurtër në këtë komunë për të njohur nga afër me problemet që ballafaqohen banorët e komunës së Likovës.
Kryetari i komunës së Likovës Sadulla Duraku tha se arsyet kryesore për largimin e shqiptarëve nga ky rajon janë problemet sociale dhe ekonomike (deklarata-video).
Zëvendëskryeministri Abdylaqim Ademi tha se është me rëndësi të veçantë të investohet në Komunë të Likovës, për të përmirësuar kushtet e jetesës, zhvillimin e infrastrukturës për të tërhequr investime në këtë rajon. Për këtë Ademi premtoi edhe ndihmën e qeverisë (deklarata-video).
Zyrtarisht nga fillimi i këtij viti në Belgjikë deri tani, kërkesë për azil kanë parashtruar gjithsej 409 qytetarë të Maqedonisë, të cilët janë kryesisht nga Likova dhe Kumanova. Ndërkaq, delegacioni belg sot qëndroi edhe në Luginën e Preshevës, për t’i bërë të qartë edhe banorëve të kësaj zone, se nuk kanë shanse të përfitojnë nga azili.

Shkëlzen Aqifi