BFI nuk tërhiqet nga Burmalia, Gruevski bisedon me Ahmetin

Kryeministri Gruevski edhe sot nuk pohoi e as përgënjeshtroi marrëveshjen me Ahmetin për tejkalimin e dallimeve rreth projektit “Shkupi 2014. Gruevski tha se për të gjitha çështjet e hapura bisedon me partnerin e koalicionit dhe se bisedimet i zhvillon në drejtim të gjetjes së zgjidhjeve të pranueshme për të dyja palët. Sa i përket objekteve fetare në shesh, Gruevski tha se për ndërtimin e tyre vendosin ata që kërkojnë ngritjen e tyre.
“Që të ndërtohet një objekt fetar vendos ai që do ta ndërtojë objektin. Ne në këtë rast nuk e ndërtojmë, kështu që nuk vendosim. Sa i përket takimeve dhe komunikimit me partnerin tonë të koalicionit, ne shumë shpesh takohemi dhe bisedojmë për shumë çështje, dhe flasim për ide të reja për përmirësimin e disa çështjeve dhe tejkalimin e problemeve e kështu me radhë”, deklaroi kryeministri Nikolla Gruevski.
Nga ana tjetër, nga Bashkësia Fetare Islame sot e përsëritën kërkesën që ti kthehet toka ku më parë ka ekzistuar xhamia Burmali.
“Bashkësia Fetare Islame si organ i vetëm fetar në Republikën e Maqedonisë dhe institucion shpirtëror, vazhdimisht deri më sot e ka ngritur zërin dhe në të ardhmen do të bëj të njejtën dhe do të kërkojë që trualli ku ka qenë Burmali Xhamia ti rikthehet asaj pasi është pronë që i takon dhe në të njejtën kohë ne nuk kemi ndërmend që të largohemi nga iniciativa e tillë”, theksoi Abas Islami, zëdhënës i BFI-së.
Ndërkohë, Alsat mëson se këtyre ditëve është realizuar një takim mes Gruevskit dhe Ahmetit, ku është arritur një marrëveshje që sheshi i Shkupit të reflektoj karakterin multi-etnik të vendit. Jo zyrtarisht meret vesh se nuk është arritur ndonjë marrëveshje konkrete rreth kishës, por në parim Gruevski dhe Ahmeti kanë ra dakord që të tërhiqet vendimi për kishën, ose në rast se do të ketë kishë, atëherë të ketë edhe xhami. Gjithashtu gjatë takimit është diskutuar edhe për përmendoret dhe se Ahmeti ka kërkuar që disa prej tyre të jenë të personaliteteve shqiptare, megjithatë nuk është precizuar numri i saktë i tyre.
 
Frosina Pandurska – Dramiqanin