Halimi nuk mohon deklaratën për kishën, shan Alsatin pse e transmetoi

Nënkryetari i PDSH-së Iljaz Halimi, edhe njëherë ka përsëritur qëndrimin e partisë së tij, se nuk i pengon ndërtimi i kishës në sheshin e Shkupit dhe se kryeqytet i shqiptarëve nuk është Shkupi, por Tetova. Sipas Halimit, deklarata e tij e transmetuar para dy ditësh në TV Alsat në emisionin ‘Rruga drejt...’ është bërë me prapavijë të qëllimshme. Madje, ai ka thënë se kritikuesit e qëndrimeve të tij, vuajnë nga kanceri i quajtur Alsat.
"Pas këtyre sulmeve që mu bënë mua dhe PDSH-së, lidhur me paraqitjen time në Rruga drejtë, shihet se kush vuan nga kanceri, e që ka emrin ALSAT, Ali Ahmeti, Imer Selmani, Bardhyl Mamuti, Artan Grubi dhe Ramadan Ramadani. Pra , këta janë djemtë e Gruevskit, i cili në momente kur është më ngushtë për shkak të trysnisë që ia bën PDSH-ja dhe shqiptarët atij, ai, i aktivizon këta brenda natës për mbrojtjen e kauzës maqedonase", thotë Iljaz Halimi, nënkryetar i PDSH-së.
Duke mos u mjaftuar me kaq, Halimi përsëriti edhe njëherë qëndrimin e tij kontrovers lidhur me kryeqendrën e shqiptarëve. Madje sipas tij, të gjithë shqiptarët tjerë, do të mund të shëptojnë vetëm përmes Tetovës, pa treguar në këtë rast se cila është ajo rrugë. 
"Sa i përket Tetovës edhe njëherë ua rikujtoj të gjithë atyre që s'e dijnë se Tetova është zemra e shqiptarisë dhe e PDSH-së. Vetëm nëpërmes Tetovës dhe PDSH-së do të mundë të shpëton Shkupi shqiptarë (ajo pjesë që ka mbetur) dhe vendbanimet shqiptare kudo që gjendet republika e Maqedonisë, nga kolonizimi dhe politika sllavo-ortodokse që aplikon Gruevski dhe argatët e tij të BDI-së me në krye Ali Ahmetin", akuzon Iljaz Halimi.
Por, për të pasur opinioni pasqyrë më të qartë se çfarë kishte deklaruar Halimi në emisionin ‘Rruga drejt...”, e përsërisim atë edhe një herë:
“Meqë atyre nuk u pengon ku 99 përqind, mos të them 100 përqind këndej Vardarit janë maqedonas, mua më së paku mund të më pengon të ndërtohet kishë. Ishalla edhe tre kisha tjera le ti ndërtojnë në sheshin e Shkupit... Atëherë as që është bisedu, as që ka pasë ndonjë propozim, ndonjë ide, ose ndonjë potencim të ekzistimit të Burmali Xhamisë... në mungesë të asaj ne kemi kërku në të njejtën mbledhje të Qeverisë të sillet vendim për rindërtimin e xhamisë në sheshin e qytetit të Tetovës”, ka deklaruar Halimi të enjten në emisionin "Rruga drejt" në Alsat-M.
“Vendimi për ndërtimin e kishës në sheshin e Shkupit dhe barazvlera e saj për ndërtimin e xhamisë në sheshin e Tetovës, nuk qëndrojnë”, kishte raguar Xhevat Ademi, deputet i BDI-së, i cili mori pjesë në të njejtin debat.
"Kryeqytet i shqiptarëve është Tetova, or zotëri, nuk më intereson mu..", pat thënë Iljaz Halimi.
Dje në mbrojtje të Halimit u vu edhe shefi i tij Menduh Thaçi. Madje, kreu i PDSH-së, tha se redaksia e TV Alsat tanimë i ka përmbushur kushtet për t’i shpallur luftë partisë së tij. Deklarata e nënkryetarit të PDSH-së Iljaz Halimit, se nuk i pengon ndërtimi edhe i tre kishave në Sheshin e Shkupit ka shkaktuar reagime të ashpra të Shoqatave të ndryshme shqiptare në vend dhe të gjitha partive politike shqiptare.

Bashkim Sulejmani