DR: Libri “Shoqëria” për klasën e katërt të hiqet nga përdorimi

Demokracia  e Re e Selmanit ka kërkuar sot urgjentisht  nga Ministria e Arsimit që të tërheq nga përdorimi librin “Shoqëria”, libër ky  për nxënësit e klasës së katërt. Ngase sipas kësaj partie në këtë libër si fqi verior i Maqedonisë konsiderohet vetëm Serbia dhe jo edhe Kosova.  Nga kjo parti vlerësojnë se pas vendimit për mësimin e maqedonishtes që nga klasa e parë ky hap  paraqet edhe një nënçmim të radhës që vjen nga ky dikaster.
“Para meje  i kam dy tekstet shkollore  në gjuhën shqipe dhe atë maqedonase nga lënda “Shoqëria” për klasën e katërt të botuar në vitin 2009.  Nëse i hapni në faqen 10 këto dy libra, do të shihni një tekst çoroditës i cili i mëson nxënësit shqiptarë por edhe maqedonas se cilat janë shtetet fqinje të Maqedonisë. Në këtë tekst mund të shihni se fqinj verior i Maqedonisë na qenka vetëm Serbia, dhe askund nuk përmendet Republika e Kosovës. DR-ja kërkon urgjentisht nga Ministria e Arsimit dhe Shkencës që ta heq nga përdorimi këtë libër, si dhe tu kërkoj falje të gjithë shqiptarëve për nënçmimin që u ka bërë”, deklaroi Gjylimsere Kasapi, kryetare e Komisionit për arsim të DR-së.