Mitrovicë: Shpërthim në ditën e Bajramit

Mitrovica është tronditur sërish ditën e Bajramit të Madh. Në afërsi të konvikteve të studentëve në veri sot në orët e mëngjesit është hedhur një mjet shpërthyes.Nga ky mjet shpërthyes janë dëmtuar disa dyqane dhe automjete ndërsa nuk është raportuar për ndonjë qytetar të lënduar.Televizioni shtetëror i Beogradit RTS thotë se  shënjestër e sulmit kanë qenë me siguri veturat e pjesëtarëve të Policisë së Kosovës. Policia po vazhdon hetimet për të zbardhur këtë rast.Një ditë më herët në veri të qytetit të Mitrovicës, në Kodren e Minatorëve është qëlluar për vdekje Hakif Mehmeti. Familja e viktimës dyshon që pas vrasjes qëndrojnë pjesëtarët e strukturave paralele serbe. Tashmë është bërë praktikë që në vigjilje të ngjarjeve të rëndësishme për Kosovën, siç është tani Asambleja e Përgjithshme e Kombeve të Bashkuara, të ndodhin incidente në veri të vendit, ku veprojnë strukturat paralele serbe. Kryetari i komunës së Mitrovicës Avni Kastrati u ka bërë thirrje qytetarëve për qetësi dhe që ta ruajnë durimin dhe të tregohen të pjekur përballë provokimeve për destabilizim të situatës në këtë pjesë.