Krasniqi:Serbia mirëpret opinionin e GJND-së

Asambleja e Përgjithshme e Kombeve të Bashkuara sonte pritet të diskutojë propozim rezolutën e Serbisë për Kosovën. Beogradi ka paraqitur mbrëmë një tekst të ndryshuar të rezolutës,  pas konsultimeve dhe harmonizimit me Bashkimin Evropian. Në propozim tekstin e ri përshëndetet gatishmëria e BE-së për lehtësimin e “dialogut ndërmjet palëve” dhe konstatohet se procesi i dialogut është faktor i paqes, i sigurisë dhe i stabilitetit në rajon. Duke komentuar ndryshimin e propozim rezolutës, Kryeparlamentari i Kosovës, Jakup Krasniqi tha se me këtë hap, Serbia mirëpret opinionin e GJND-së për pavarësinë e Kosovës. “Rezoluta pothuajse është ndryshuar tërësisht. Përmbajtja e saj afirmon opinionin e GJND-së dhe e thërret Bashkimin Evropian që ta udhëheqë dialogun në mes Kosovës dhe Serbisë si dy vende të barabarta, sovrane, për paqen, sigurinë dhe stabilitetin në rajon” tha kryeparlamentari Jakup Krasniqi.Qeveria e Kosovës thotë se draft-rezoluta e re hedh poshtë çdo mundësi për negociata për statusin politik të Kosovës dhe bën ftesë për bashkëpunim ndërmjet palëve me qëllim të forcimit të paqes dhe stabilitetit në rajon dhe hap perspektivën e integrimeve euro-atlanike. Zëvendëskryeministrit Hajredin Kuqi deklaroi sot se draft-rezoluta tani është në përputhje të plotë me realitetin në Kosovë dhe në rajon.“Qeveria e Kosovës e mirëpret tërheqjen e asaj Rezolute. Ne kemi qenë të bindur se ajo Rezolutë nuk do të shkon në AP të OKB-së. Kosova është e gatshme për bashkëpunim ndër-shtetëror me cilindo shtet, për fqinjësi të mirë, për bisedime që kanë për synim bashkëpunimin rajonal, por nuk do të ketë bisedime për statusin dhe çështje e brendshme të Republikës së Kosovës” shtoi zv.kryeministri i Kosovës Hajrdin Kuqi. Qeveria e Kosovës përmes një deklarate ka shprehur keqardhje për deklaratën e bërë publike nga Qeveria e Serbisë, e cila në menyrë dëshpëruese përpiqet të krijojë keqinterpretime dhe pritje false lidhur me përmbajtjen e draft-rezolutës së re të përpiluar nga BE-ja dhe SHBA-ja. Shkëlzen Osmani