AAK kërkon kthimin e Haradinajt në Kosovë

Аleanca për Ardhmërinë e Kosovës pret që lideri i saj, ish kryeministri Ramush Haradinaj të rikthehet shpejt në atdhe dhe të vazhdojë të japë kontributin e tij për ndërtimin e shtetit. Nënkryetari i AAK-së Ahmet Isufi tha për ALSAT M se partia beson në pafajësinë e Haradinajt dhe lirimin e tij të shpejtë, pasi bëhet fjalë për aktakuzën e njëjtë për të cilën ai ishte shpallur i pafajshëm.
“Ne në fakt po presim lirimin e tij sa më të shpejt, sepse mendojmë se është momenti që ai të jetë në Kosovë. Ai tani ka aktakuzën e njëjtë, me disa shkurtime të cilat janë bërë, për pika ët caktuar por ne besojmë e z. Haradinaj shumë shpejt do të vijë në Kosovë“, Ahmet Isufi, thotë nënkryetar i AAK-së.
Megjithëse AAK ka mbetur pa liderin e saj karizmatik, ajo nuk ka pushuar akuzat dhe kritikat në adresë të Qeverisë së Kosovës për të cilën është e bindur se po i shkakton dëme të mëdha vendit në mungesë të një plani qeverisës. Një prej dobësive të kësaj qeverie, sipas Isufit, është edhe dështimi i saj për të siguruar njohje të reja për shtetin e ri.
“Tani kemi shtete të cilat janë të rezervuara ose kundër pavarësisë së Kosovës. Gabimi i diplomacisë sonë e cila nuk po arrin ta kuptojë se tani është një realitet tjetër kur duhet angazhuar ekipe për lobim dhe jo të mjaftohen vetëm me kapacitetin e ministrisë së Punëve të Jashtme dhe të ministrit”, shton Isufi.
Kryeministri Hashim Thaçi dhe ministri i Jashtëm Skënder Hyseni kanë premtuar mbi 30 njohje të reja pas vendimit të GJND-së në favor të Kosovës, një moment shumë i volitshëm për të marrë njohje të reja, e që sipas opozitës nuk është shfrytëzuar si duhet për lobim nga ana e institucioneve të Republikës së Kosovës.
Shkëlzen Osmani