Berisha dhe Thaçi takohen para mbledhjes së OKB-së

Dy kryeministrat, i Kosovës dhe i Shqipërisë, u takuan pak para nisjes për në sesionin vjetor të OKB-së për të bashkërenduar përpjekjet për shtimin e njohjeve për pavarësinë e shtetit më të ri të Ballkanit. Pas një takimi që zgjati 30 minuta, shefi i Qeverisë Sali Berisha dhe homologu i Kosovës Hashim Thaçi u shprehen njëzëri se vendimi i Gjykatës Ndërkombëtare të Drejtësisë është tashmë baza formale ligjore për çdo vend që të njohë pavarësinë."Vendimi i GJND-së çështjen e njohjes së pavarësisë së Kosovës e ka shëndrruar në çeshtje të njohjes, respektimit dhe zbatimit të ligjit ndërkombëtar. Pra, është një çështje shumë herë më e madhe se sa mes Shqipërise dhe Kosovës, çeshtje e cila jam i bindur do të gjejë gjithnjë e më shumë mirëkuptim më të madh", deklaroi kryeministri Sali Berisha."Në asamblenë e përgjithshme të OKB-së kemi besim të plotë që për Kosovën do të ketë suksese të reja. Një angazhim ndërkombëtar për sukseset e reja të Republikës së Kosovës por në të njejtën kohë dhe njohjet për Kosovën do të vazhdojnë", u shpreh kryeministri i Kosovës, Hashim Thaçi. Ndërkohë dy kryeministrat komentuan edhe përfshirjen e Spanjës në negocimin e rezolutës serbe për pavarësinë."Përpjekja spanjolle për të ndihmuar Beogradin përshtatet me realitetin e ri", tha Berisha. "Zgjidhja më e mirë do të ishte sikur Serbia ta tërhiqte këtë rezolutë", tha Thaç. Në 9 shtator delegacioni shqiptar që do të marrë pjesë në sesionin vjetor të OKB-së që do te përbehet nga kreu i shtetit Bamir Topi, kryeministri Sali Berisha dhe ministri i jashtëm Ilir Meta.  Alsat