Pahor thërret Tadiçin në Lubjanë për projekt rezolutën e Serbisë

Boris Tadiç dhe Borut Pahor

Vazhdojnë përpjekjet diplomatike ndërmjet Bashkimit Evropian dhe Beogradit për gjetjen e një kompromisi për ndryshimin e pr/rezolutës serbe për Kosovën e cila do të diskutohet më 9 shtator në Asamblenë e Përgjithshme të OKB-së. Bisedimet janë përqendruar në ndryshimin e qëndrimeve të Beogradit zyrtar ndaj mendimit të GJND-së dhe në veçanti bisedave me Prishtinën. Presidenti serb Boris Tadiç udhëton sot drejt Sllovenisë për të takuar kryeministrin slloven Borut Pahor në një darkë private.Media serbe shkruajnë sot se fokusi i bisedimeve do të jetë ajo se çfarë Lubjana mund të bëjë për të gjetur një zgjidhje që do të kënaqte numrin më të madh të shteteve të Bashkimit Europian. Kryeministri slloven Pahor është cituar të ketë thënë se është shumë e rëndësishme që Serbia ka perspektivën evropiane dhe se Sllovenia do ta mbështesë atë.Kabineti i presidentit Tadiç deklaron se do të jetë një vizitë zyrtare pune në Lubjanë, ndërsa zyra e kryeministrit Pahor thotë se vizita është private dhe parashikohet shkëmbimi i opinioneve në lidhje “me disa çështje aktuale ndërkombëtare në një bashkëbisedim miqësor”.Edhe pse kabineti i Pahor nuk ka specifikuar se cilat do të jenë temat e diskutimit, vizita vjen pas presionit nga shtete që kanë njohur Kosovën, mes tyre dhe Sllovenia, ndaj Serbisë të heqë dorë ose të ndryshojë draft rezolutën që do të jetë në agjendën e diskutimeve të Asamblesë së Përgjithshme në Nju Jork më 9 shtator. Autoritetet serbe kanë bërë me dije se janë të gatshme për kompromis, por kanë këmbëngulur në qëndrimin e tyre se Rezoluta nuk mund të shkelë “vijat e kuqe” për Serbinë. Një presion diplomatik është bërë mbi Beogradin ditët e fundit, përmes ministrave të jashtëm të Gjermanisë dhe Britanisë së Madhe, që i kanë bërë me dije Serbisë se rruga e saj drejt BE-së mund të vështirësohet në rast të mosarritjes së një zgjidhjeje me Brukselin për rezolutën. Balkanweb