Ministri i jashtëm britanik po qëndron në Beograd

Ministri i Jashtëm i Britanisë së Madhe, Uilliam Hague, arrin sot në Beograd. Ai do të takohet me zyrtarët më të lartë shtetërorë të Serbisë dhe do të bisedojë mbi tekstin e projekt rezolutës për Kosovën, të cilën Serbia ia ka paraqitur Asamblesë së Përgjithshme të OKB-së. Shefi i diplomacisë britanike vjen në Serbi disa ditë pas vizitës së ministrit të Jashtëm të Gjermanisë, Guido Westerwele, i cili kishte deklaruar se rezoluta për Kosovën duhet të harmonizohet me Bashkimin Evropian. Vendet më të rëndësishme të Bashkimit Evropian po bëjnë përpjekje ta bindin Beogradin të ndryshojë tekstin e projekt-rezolutës, e cila kërkon edhe vazhdimin e bisedimeve lidhur me statusin e Kosovës. Ato dhe vendet tjera që e kanë njohur shtetin e Kosovës theksojnë se statusi i Kosovës është çështje e përfunduar dhe se kërkesa e Beogradit është anakronike. QIK