Shpërthim në Zubin Potok, dëmtohen dy vetura të policisë

Vetura e djegur nga shpërthimi

Një shpërthim i fuqishëm ka ndodhur sot në orën 2 të mëngjesit, në një stacion policor në komunën veriore të Kosovës, Zubin Potok, me ç’rast janë dëmtuar dy vetura të Policisë së Kosovës dhe një veturë private është djegur tërësisht.Zyrtar të Policisë bënë të ditur se ky shpërthim është krijuar nga hedhja e një granate dore të tipit “M 57”.“ Sot në orët e hershme të mëngjesit, konkretisht rreth orës 2, në oborrin e stacion policor të Zubin Potokut është regjistruar një shpërthim dhe një veturës civile i është vënë zjarri e cila gjendej në afërsi të këtij stacioni policor. Policia e Kosovës, konkretisht hetuesit e drejtorisë rajonale të Mitrovicës kanë dal menjëherë në vend të ngjarjes ku e kanë ekzaminuar atë pjesë. Sipas vlerësimeve fillestare kemi të bëjmë me një granatë dore “M 57” e cila dyshohet se mund të jetë hedhur nga një largësi” njoftoi zëdhënësi i Policisë së Kosovës Brahim Sadriu.Sipas Policisë së Kosovës, përveç dëmtimeve në dy veturat e policisë dhe djegies së një veture civile e cila ishte pronë e një zyrtari policor. Fatmirësisht nuk ka pasur persona të lënduar. “Nga ky shpërthim nuk kemi pasur persona të lënduar, përveç dëmtimeve materiale të dy veturave të policisë dhe një veturë “Opel Corsa” pronë e një prestari të Policisë së Kosovës është djegur tërësisht” tha Brahim Sadriu zëdhënës i Policisë së Kosovës.Sipas zyrtarëve policor, hetimet për këtë rast do të vazhdojnë deri në gjetjen e personit i cili ka shkaktuar sulmin. Shkëlzen Osmani