Grabitje dhe pengmarrje në Tiranë, prangoset i riu

Një person i armatosur ka terrorizuar Tiranën. 25 vjeçari pasi vodhi një bankë pranë selisë së Presidencës mori peng një studente 19 vjeçare. Ngjarja ka shokuar me qindra qytetarë dhe punonjës që jetuan momente ankthi, kur personi i armatosur lëvizte në rrugët e kryeqytetit në tratativë për t'i ikur policisë.
25 vjeçari Romeo Leka, me precedentë penalë, me pistoletë në dorë ka vjedhur filialin e bankës Raiffeisen që ndodhen në ambientet e brendshme të Hotel Rogner. Pasi është larguar, policia e ka ndjekur. Për t'i bërë presion policisë autori ka marrë peng vajzën. Në vendin e ngjarjes u afruan me shpejtësi edhe forca të tjera të Policisë së Tiranës dhe të Repartit RENEA. Ata kanë negociuar me rrëmbyesin përreth 30 minuta.
Drejtori i Policisë Tonin Vocaj, tha se gjatë këtyre momenteve të vështira, është synuar që të ruhej qetësia e pengmarrësit, deri në organizimin e operacionit për kapjen dhe neutralizimin e tij. Falë ndërhyrjes së forcave speciale u bë i mundur çlirimi i vajzës së rrëmbyer, kapja e arrestimi i autorit si dhe sekuestrimi i të gjithave parave të grabitura.