Fyle porositë kosovarët: Punoni më shumë, më pak flisni

Komisioneri për Zgjerim i Bashkimit Evropian, Stefan Fyle, deklaroi në Prishtinë se autoritetet e Kosovës, nuk duhet vetëm të flasin por ata më shumë duhet të punojnë në luftimin e korrupsionit, krimit të organizuar dhe sundimin e ligjit si kritere bazë për shkurtimin e rrugës drejt integrimit në Bashkimin Evropian. Komisioneri Fyle, gjatë takimit me krerët shtetëror të Kosovës, ka bërë të ditur se viti 2010 do të jetë një periudhë vendimtare për Kosovën, për të krijuar një stabilitet ekonomik dhe që në mënyrë aktive të jenë të përfshirë në reformat të cilat dërgojnë Kosovën në BE.
“Mendoj se është shumë me rëndësi për autoritetet kosovare që gjatë këtij viti të krijojnë një stabilitet politik... Është po ashtu me rëndësi që autoritetet kosovare që të jenë në mënyrë aktive të përfshirë në reformat që lidhen me BE-në... Ne dëshirojmë që jo vetëm të dëgjojmë fjalë por të ketë punë më shumë në një numër të fushave që ne kemi pritur progres nga raporti i Progresit për vitin 2009 siç janë sundimi i ligjit, luftimi i korrupsionit, kundër krimit të organizuar dhe qeverisje e mirë”, theksoi Fyle.
Presidenti Fatmir Sejdiu dhe kryeministri Thaçi, janë shprehur të gatshëm për rritjen e angazhimit të institucioneve për të përmbushur kriteret të cilat duhet të përmbushën në rrugën e integrimit në BE.
“Ajo që është ambicie e jonë dhe duhet të jetë punë në vazhdimësi, është thellimi i veprimeve të institucioneve të Kosovës për të bërë punë, për të përmbushur kriteret që të ecim shpejtë në përmbushjen e kritereve që ne i supozojmë dhe që do t’i marrim ndërkohë edhe sa i përket liberalizimit të vizave pro edhe sa i përket proceseve të integrimeve”, theksoi Fatmir Sejdiu, president i Kosovës.
“E informova zotin Fyle për hapat të cilat i ka ndërmarr Qeveria e Kosovës në këto momente të rëndësishme për rendin demokratik, për stabilitetin, për zbatimin e kritereve demokratike, coftë në ekonomi, coftë në legjislacion apo në apo në aspektet tjera”, deklaroi Hashim Thaçi, kryeministër i Kosovës.
Kjo është vizita e parë e Stefan Fyles në rajon që nga marrja e detyrës si komisioner për Zgjerim i BE-së. Fyle ka arritur në Prishtinë pas vizitave që ka zhvilluar në vendet tjera të rajonit, në Beograd, Podgoricë dhe Sarajevë.  

Shkëlzen Osmani