Parkun botëror i çokollatës në Pekin

Me mijëra adhurues të çokollatës u rreshtuan për të hyrë në atraksionin e ri dhe thjeshtë më të ëmbël e tërheqës turistik në kryeqytetin e Kinës, Pekin. Bëhet fjalë për Parkun botëror të çokollatës. Në të gjenden me qindra atraksione interesante të çokollatës si kopja e Murit të Madh kinez, ushtarët në terakotë të çokollatës dhe shumë gjëra të tjera të shijshme. Ka vend edhe  për një BMV të çokollatës për të cilin u shpenzuan tre ton çokollatë. Turmat e njerëzve u grumbulluan që në mëngjes.
"Erdha këtu pasi më solli e dashura ime ... Ajo e do shumë çokollatën, madje në shtëpi ka edhe koleksion. Lexova shumë për Parkun në Internet dhe mendoj se ajo që është bërë është kënaqësi për sytë", tha Xhia, vizitor.
Këtu, vërtetë çdo gjë është mjaft tërheqëse. Por Parku ka edhe një mangësi. Ngrënia e eksponateve është e ndaluar rreptësisht për të gjithë vizitorët. Për tu punuar të gjitha këto ndërtime dhe sende të tjera të ëmbla, organizatorëve iu nevojitën 80 ton çokollatë dhe disa milionë dollarë. Ndërkaq, vitin e kaluar konsumimi i produkteve të çokollatës në Kinë u rrit me 18 për qind.

Ivan Blazhevski