Një vit nga ngritja e shtëpisë përkujtimore për Nënë Terezën

Mbi 80 mijë vetë nga vendi dhe bota kanë vizituar shtëpinë përkujtimore të Nënë Terezës nga koha kur është hapur një vit më parë. Përveç vizitave individuale ka pasur edhe në grupe thonë nga drejtoria e shtëpisë së Nënë Terezës. Nuk kanë munguar personalitete të politikës, ministra, ambasadorë si dhe delegacione shtetërore. Muzeu është i hapur gjatë gjithë javës ndërsa vizitorët udhëhiqen nga katër ciceronet që flasin shumë gjuhë të botës.
“Gjithashtu përveç vizitorëve të huaj numri është mjaft i madh edhe i vizitorëve shqiptarë siç janë nga Maqedonia ashtu edhe nga Kosova, Shqipëria dhe nga diaspora. Vijnë veçanërisht në periudhën e pushimeve”, deklaroi Narona Luma – cicerone.
Këtë vit në ambientet e shtëpisë paralajmërohet hapja e ekspozitave me fotografi dhe dokumente personale të Nënë Terezës.
“Pasi muzeu vëmendje të veçantë i kushton bartjes së vlerave të cilat prinin misionin e Nënës Terezës; në 2010 do të realizojmë më shumë projekte edukative për fëmijët e moshës parashkollore dhe shkollore si dhe fëmijët me nevoja të posaçme”, tha Renata Kutera Zdravkovska – drejtoreshë e shtëpisë së nënë Terezës.
Në shënimin e përvjetorit të hapjes së shtëpisë u promovua edhe një film dokumentar për ardhjen pas 50 vitesh të Nënë Terezës në Shkup, broshura mbi jetën e saj si dhe faqja e internetit në gjuhën maqedonase. Së shpejti faqja e internetit do të përpilohet dhe në gjuhën shqipe bëjnë të ditur nga muzeu.

Meral Ismaili