Analistët: ‘Gruevski po tensionon raportet ndëretnike’

Analistët politikë Ramadani dhe Kocevski, vlerësojnë se Projekti“Shkupi 2014”, mund t’i dëmtojë raportet ndër-etnike në vend. Sipas tyre, kryeministri Nikolla Gruevski me vetëdije po luan me këtë çështje të ndjeshme. Analisti politik Ismet Ramadani, thotë se kjo sjellje e kryeministrit, po fut vendin në situatë të ndërlikuar që e pengon zhvillimin e demokracisë. “Kjo do të thotë se Qeveria, VMRO-DPMNE-ja na bën të qartë të gjithëve se atë që e ka si moto të veprimit të vet, me populizëm dhe nacional-romantizëm të vonuar në një mënyrë do të prezanton edhe në këtë formë duke ndërtuar objekte skulptura dhe duke promovuar projektet që drejtpërdrejtë dëmtojnë marrëdhëniet ndërnacionale dhe ndërfetare”, deklaroi Ismet Ramadani, analist. Edhe publicisti Danillo Kocevski vlerëson se projekti ‘Shkupi 2014’ mund të ndikojë  në marrëdhëniet ndëretnike dhe ndërfetare në vend. Kocevski kërkon që nëpërmjet bisedimeve të gjendet balancë rreth ndërtimit të objekteve fetare në sheshin e Shkupit. “Duhet të gjejmë ndonjë zgjidhje, e cila do t’i pengonte mosmarrëveshjet ndëretnike që janë shumë të rëndësishme për Maqedoninë dhe për qytetin e Shkupit si kryeqendër e Maqedonisë. Duhet të gjendet balancë rreth objekteve fetare në shesh, të gjendet balancë ku të gjithë do të jenë të kënaqur. Xhamia ka një traditë”, u shpreh Danillo Kocevski, publicist. Analisti politik Ismet Ramadani nga ana tjetër, vlerëson gjithashtu se subjekti politik shqiptar në Qeverinë e Maqedonisë duhet ta kushtëzojë Gruevskin me mënyrën e ndarjes së buxhetit, për ta shfrytëzuar për zbutjen e varfërisë, ndërtimin e infrastrukturës, por edhe zhvillimin dhe afirmimin e kulturës shqiptare.

Shkëlzen Aqifi