Seancë për përmbytjet në Shkodër, mungojnë deputetët e PS

Kuvendi i Shqipërisë do të mblidhet të hënën në seancë të jashtëzakonshme që lidhet me situatën e emergjencës të krijuar në zonën e nën Shkodrës. Kryetarja e Kuvendit Jozefina Topalli i ka dërguar një letër, secilit prej deputetëve socialistë ku i kërkon pjesëmarrjen në seancë si detyrim sa kushtetues, aq dhe moral për situatën e krijuar nga përmbytjet. Opozita e bojkoton parlamentin që nga mbajtja e zgjedhjeve pasi konsideron se ato janë manipuluar. Në zonën e Shkodrës, ka pasur përmirësim të situatës jo vetëm në zonat e përmbytura brenda qytetit, por edhe në komunat problematike, që gjatë 15 ditëve të katastrofës ngjanin me ishuj. Emergjenca po i lë vendin fazës tjetër atë të rehabilitimit të zonës dhe kthimin e banorëve, të cilët uji u ka shkaktuar dëme të mëdha në banesat e tyre. Ndërsa ka dalë në pah edhe rreziku i përhapjes së epidemive.