Arifi për Alsat-M: As Gruevski e as kush tjetër nuk mund ta minimizoj vizitën në Greqi

Letra e kryeministrit Nikolla Gruevski drejtuar kolegut të tij grek Papadhimos, nuk mund të nënvlerësojë qëllimin dhe rëndësinë e iniciativës së shqiptarëve për të lëvizur proceset euro-integruese përpara. Kështu ka deklaruar për ALSAT M, zv/kryeministrja Teuta Arifi pas përpjekjes së kryeministrit dhe kabinetit të tij që të paraqesin këtë vizitë të Arifit si dërguese të letrës për takim me kryeministrin grek Papadhimos.
“Asgjë nuk mund të minimizojë vullnetin e mire të partisë politike të cilën e përfaqësojë unë BDI-në, asgjë nuk mund të minimizojë vullnetin e madh politik të shqiptarëve të Maqedonisë dhe rajonit për integrim në NATO dhe BE. Unë këto gjëra i shoh si një tendencë për të shfrytëzuar vullnetin shqiptar dhe iniciativën tone të përgjithshme për të hapur procese të reja. Ne si klasë politike shqiptare kemi qenë të gatshëm që të japim kontributin tonë pozitiv për anëtarësimin e vendit në BE dhe NATO dhe pse jo zgjerim të BE-së në rajonin e Ballkanit Perëndimor dhe kjo është qasje jonë, qasje e drejtë dhe konstruktive”, deklaroi Teuta Arifi, zv/ kryeministre për çështje evropiane.
Ndërkohë Gruevski në letrën e drejtuar kryeministrit grek Papadhimos kërkon një takim, që sipas tij do të ishte stimul shtesë për zgjidhjen sa më shpejtë të çështjes së emrit.
“Më lejoni që me këtë letër të shprehë gatishmërinë dhe vullnetin e mirë për gjetjen e një zgjidhjeve të përbashkët të pranueshme për çështjen e emrit e cila është hapur nga ana e shtetit tuaj, ndërsa ka të bëjë me emrin e vendit tim. Në prizmin e mirëkuptimit të ndërsjellë dhe dëshirës për arritjen e interesit të përbashkët dhe mbrojtjen e shtetit tim dhe shtetit tuaj nga aspektet e fituesve dhe humbësve në këtë çështje, do doja me këtë letër të hap edhe një herë mundësinë për takim në nivel më të lartë dhe dialog i cili do udhëhiqej me qëllim të stimulimit të procesit për zgjidhjen e çështjes së emrit”, thuhej ndër të tjera në letrën e kryeministrit Gruevski.
Ndërkaq, në takimin mes zv/kryeministres Teuta Arifi dhe kolegut të saj grek Pangalos, kërkesa e Arifit që Maqedonia të anëtarësohet në NATO me referencën IRJM nga ana greke është pritur me rezerva.
“Gjithsesi që unë e shtrova këtë si qëndrim të tërë spektrit politik që është në Maqedoni, ndërkohë pala greke mbeti më e rezervuar sa i përket kësaj qasjeje, kryesisht duke u mbajtur në aspektin gjeneral të konstruktivitet apo të dëshirës për integrim më të shpejtë të vendit në NATO apo Bashkimin Evropian”, tha  Teuta Arifi, zv/kryeministre për çështje evropiane.
“Ekziston edhe ajo që në gjuhën angleze sqarohet si instrument  për ndihmë paraqasëse, në suaza të së cilës  do ët ofrojmë një sërë shërbimesh, përderisa qeveria tjetër dëshiron ti shfrytëzoj  si ndihmë  që të lehtësohet procesi i bisedimeve  që zhvillohen me Bashkimin  Evropian”, Teodoros Pangalos, zv/ kryeministër i Greqisë.
Në takimin mes dy kolegëve, Arifit dhe Pangalos, është diskutuar edhe për mbështetjen e shteteve të BE-së në procesin e integrimeve evropiane të rajonit, bashkëpunimi ndërkufitar etj. Kjo është vizita e parë e Arifit në Greqi, pas 10 vjetësh, duke rihapur komunikimin mes autoriteteve të të dy vendeve.  Semra Jakupi