Nuk përfillen ‘ultimatumet’ e Fazli Veliut

Fazli Veliu nuk mori mbështetjen e qeverisë, përkatësisht të përfaqësuesve shqiptarë në të, për zgjidhje të statusit të ish pjesëtarëve të UÇK-së. Ultimatumet e Veliut nuk u përfillën! I irrituar nga kjo heshtje e autoriteteve, kreu i shoqatës së veteranëve të luftës dhe ish deputeti Fazli Veliu e quan Maqedoninë - ‘Iliro-Maqedoni’. Përmes një komunikate, ai iu drejtua familjeve të dëshmorëve si dhe ish pjesëtarëve të UÇK-së, se iniciativa për statusin e tyre do të vazhdojë të prezantohet për mbështetje tek institucionet e larta të Kosovës, Shqipërisë, por edhe të Iliro-Maqedonisë
“Qendrat kryesore të kësaj çështjeje mbarëkombëtare do t'i kemi në Tiranë, Prishtinë dhe Shkup (Tetovë, Kumanovë), po ashtu dhe xhiro-llogaritë e unifikuara dhe të udhëhequra nga përfaqësues të çështjes kombëtare dhe të familjeve të Dëshmorëve”.
Në komunikatën e kësaj shoqate, saktësohet se iniciativa e 21 Janarit kishte për synimin unifikimin e programeve dhe statusit të Dëshmorëve të Atdheut të rënë nën Emblemën e Ushtrisë Çlirimtarë të Kosovës, të Ushtrisë Çlirimtare Kombëtare, të UÇPMB-së, si dhe statusin e programin e familjeve të Dëshmorëve.
“SHVL-UÇK do t'i kryej detyrimet ndaj jush, sipas mundësive dhe kapacitetit mbështetës që ka. Kërkesa jonë drejtuar institucioneve më të larta në këtë vend deri më sot nuk ka gjetur përkrahje dhe mbështetje institucionale. Megjithatë, ju dhe ne do të vazhdojmë me këmbëngulje që t'i realizojmë të drejtat e barabarta e të patjetërsueshme”.
Ultimatumi i Veliut dhe në përgjithësi statusi i ish pjesëtarëve ët UÇK-së i ka heshtur qeveritarët shqiptarë. Ditë më parë disa nga ministra të BDI-së u shprehën të gatshëm që të ndajnë pjesë nga paga e tyre për familjet e dëshmorëve, ndërsa të tjerë, e vlerësuan të palogjikshëm një gjë të tillë, pasi në rast se do të heqin pjesë nga paga, ngrihen dyshime se ata jetojnë me para të tjera dhe jo nga rroga. Bedri Rexhallari