Pranga Prof. Qufli Osmanit për mitmarrje nga studentët

Sektori për Punë të Brendshme në Tetovë, vuri në pranga dje në mesditë 39 vjeçarin Qufli Osmani, profesor i rregullt në Universitetin Shtetëror të Tetovës, për shkak të dyshimeve se ka kryer dy vepra penale “shpërdorimin e detyrës” si dhe “mitmarrje”. Profesori i arrestuar në fakultetin filozofik të USHT-së, kishte kërkuar prej 4 studentëve nga 1500 denarë, për të mbajtur orë shtesë mësimi, me qëllim që ata të kalonin lëndën e Psikometrisë që ai ligjëronte,-thuhet në raporton e Sektorit të Punëve të Brendshme. Një nga studentët, i cili paraprakisht kishte paraqitur rastin në Polici, i dha të hollat profesorit të cilat ishin bërë me shenjë. Gjatë kontrollit që i është bërë profesorit në zyrën e tij, me urdhër të gjykatës Themelore të Tetovës, i janë gjetur në xhep, paratë e bëra me shenjë, si dhe para të tjera të marra nga studentët për të njëjtin qëllim. Ndaj profesorit Osmani, u ngrit padi penale, dhe sot ai doli para Gjykatës Themelore të Tetovës. Sipas lajmit të publikuar në faqen e internetit www.studentët.info,  studentët që denoncuan këtë rast, do të shpërblehen nga USHT, me heqjen e detyrimit të pagesës së semestrit. Sipas USHT-së, të gjithë studentët që këtë semestër kanë provim tek ky profesor, do ta mbajnë provimin para komisionit përkatës. ALSAT tentoi të merrte të dhëna zyrtare nga Zyra për Informim e USHT-së, por prej andej nuk deshën të komentonin. Me qëndrim zyrtar nuk doli as avokati mbrojtës i profesorit Qufli Osmani.  Bashkim Sulejmani