Aleanca Kuq e Zi: Shqipëria ta tërheqë përkohësisht ambasadorin nga Shkupi

Aleanca Kuq e Zi Maqedoni, përmes një reagimi me shkrim për mediat, reagon ashpër ndaj skandalit me mungesën e flamurit shqiptar në takimet që realizoi Ministri i Mbrojtjes së Republikës së Shqipërisë, Arben Imami gjatë qëndrimit në Maqedoni.Në rast se Maqedonia, thuhet në reagim, nuk kërkon falje zyrtare për këtë skandal, por edhe për skandalin me hendbollistët, AK kërkon nga Tirana zyrtare të shqyrtojë mundësinë për tërheqjen e përkohshme të ambasadorit shqiptar nga Shkupi, por edhe dëbimin e përkohshëm të ambasadorit maqedonas nga Tirana. "Mungesa e flamurit shqiptar në një takim të zyrtarëve të Maqedonisë dhe Shqipërisë, aq sa ofendon shtetin shqiptar edhe më tepër ofendon shqiptarët e Maqedonisë. Për këtë arsye është e patolerueshme heshtja e faktorit politik shqiptar në Maqedoni, posaçërisht atij në pushtet", thuhet në reagim. Në qoftë se nuk ndërpritet sjellja injorante e shtetit maqedonas  ndaj shqiptarëve, AK do të fillojë përgatitje për organizimin e protestave gjithpopullore në Shkup, Tetovë dhe qytetet tjera në Maqedoni ku jetojnë shqiptarët, shtohet më tej në reagimin e Aleancës Kuq e Zi Maqedoni. MIA