E harruan në qeli fiton 22 milion dollarë

Një person që u mbajt dy vjet i burgosur në SHBA, pas një vendim gjykate fitoi 22 milion dollarë dëmshpërblim, një prej shumave më të mëdha të ndara ndonjëherë në histori për gabimet e sistemit të drejtësisë. 58-vjeçari Stephen Slevin, nga Nju Meksiko u arrestua në vitin 2005 për drejtimin e makinës në gjendje të dehur, por gjykata praktikisht e harroi në qeli ndërsa priste të paraqitej përpara saj dhe ai qëndroi më shumë se dy vjet në paraburgim, në pritje të procesit që nuk u realizua kurrë.  Gjykata vendosi në favor të tij për shkak se 58-vjeçari qëndroi në një qeli paraburgimi, e cila është paraparë për të mbajtur një person vetëm për disa ditë, por që Slevin u mbajt për dy vjet i izoluar pa iu dhënë asnjëherë mundësia të dilte nga dhoma dy metra e gjerë dhe tre e gjatë, që të takohej me familjarët dhe të kishte asistencë mjekësore. Pas lirimit Slevin paraqiti një padi ndaj shtetit dhe një gjykatë i akordoi dëmshpërblimin rekord, për burgosje të padrejtë dhe dhunim të të drejtave thelbësore kushtetuese.“Nuk e bëmë asnjëherë këtë proces për para. Pacienti im ka probleme mendore nga koha e kaluar në qeli dhe duhet të vizitojë rregullisht qendra psikologjie. Ajo që ka kaluar ai është e paimagjinueshme”, u shpreh avokati mbrojtës. Alsat-M